Read Свето Писмо (Гаврилова) 1990 Јудита 9 Bible Online

Јудита 9 - Свето Писмо (Гаврилова) 1990 bible

Јудита 9

¹Тогаш Јудита падна ничкум, си ја посипа главата со пепел и го фрли костретот од себеси што го носеше. И токму тогаш, кога во Ерусалим, во домот на Господа, кадеа со вечерен темјан, таа, пак. извика со висок глас кон Господа и рече:

²»Господи, Боже на мојот татко Симеона, чија рака Ти ја вооружи со меч да им се одмазди на туѓинците, кои заради срам беа соблекле една девојка, и ги разголија бедрата и ја осквернија утробата нејзина за срам. Ти рече дека тоа не смеат да го направат, но сепак тие го направија.

³Затоа ги предаде нивните кнезови да бидат заклани. Постелата нивна што ја виде измамата нивна — ја облеа со крв. Ти удри по робовите и господарите; удри по владелите на нивните престоли.

⁴Нивните жени на грабеж ги предаде и ќерките во ропство, а сиот грабеж им го даде на синовите возљубени од Тебе, кои ревнуваа со Твојата ревност, се одвратија од нечистотијата на нивната крв и на помош Тебе Те повикаа. О, Боже, Боже мој, послушај ме мене, вдовицата!

⁵Ти си го направил и она што беше пред тоа, а ќе го направиш И она што ќе биде по тоа, а на ум го имаш и сегашното и идното; што си намислил — тоа и станува.

⁶Тоа што си го намислил, тоа и се јавува, велејќи: ‚Еве, ме!‘ Сите Твои патишта се подготвени, а Твоите одлуки се предвидени од Тебе.

⁷Еве, Асирците се намножија во својата сила, се гордеат со своите коњи и со коњаниците, се гордеат со силните раце на пешаците; се надеваат на штитот, копјето, лакот и праќката, а не знаат дека Ти си Господ, Кој ги уништува војните.

⁸Името Твое е Господ. Скрши им ја нивната сила со Твојата моќ, уништи ја нивната сила со гневот Твој, зашто наумија да го осквернат Твоето светилиште, да се подбијат со мирното живеалиште, каде живее Твоето преславно име: со железо да го скршат рогот на Твојот жртвеник.

⁹Види ја нивната надуеност, а гневот Твој прати го врз нивните глави, а на мојата вдовичка рака дај ѝ сила да го направам она што сум го намислила.

¹⁰Со устата на мојата итрина порази го слугата заедно со водачот, а водачот заедно со неговиот слуга. Скрши ја нивната гордост со раката на една жена.

¹¹Зашто Твојата сила не е во множеството, ниту во моќните е Твојата моќ; Ти си Бог на смирените. Ти си помошник на понизните, застапник на немошните, покровител — на паднатите духом И спасител на очајаните.

¹²Боже на мојот татко, Боже на наследството Израилево, Господаре на небото и земјата, Создателе на водите, Царе на секое Твое создание! Послушај ја молитвата моја!

¹³Зборот мој, и итрината моја, направи ги рана за оние што намислиле страотии против Твојот завет, против Твојот свет дом, против Сион и против домот на Твоите синови.

¹⁴Вразуми го сиот Твој народ и секое племе, за да видат дека Ти си Бог, Бог на секаква сила и крепост и дека Израилот нема друг заштитник освен Тебе.«