Read Свето Писмо (Гаврилова) 1990 Книга Естир 1 Bible Online

Книга Естир 1 - Свето Писмо (Гаврилова) 1990 bible

Книга Естир 1

¹Потоа во дните на Артаксеркса, — тој Артаксеркс царуваше над сто и дваесет и седум области до Индија до Етиопија, —

²во тоа време, кога царот Артаксеркс седеше на својот царски престол, што е во престолнината Суза,

³во третата година на своето царување, тој приреди гозба за сите свои кнезови и слуги, за главните војводи на персиската и мидијската војска и на своите обласни управници,

⁴покажувајќи многу денови, сто и осумдесет дена, големо богатство на царството свое и голем сјај на своето величие.

⁵Откако завршија тие денови, царот приреди за народот свој, кој се наоѓаше во престолнината Суза, за мало и големо, седумдневна гозба во градскиот дом на царскиот дворец.

⁶Бели, памучни и со сина боја волнени пердиња, прицврстени со ленени и пурпурни врвци, висеа на сребрени алки и мермерни столбови.

⁷Имаше златни и сребрени легла на плочникот, послани со зелен, бел, жолт и црвен мермер.

⁸Јадењата се служеа во златни садови и садови разнообразни, по цена од триесет илјади таланти; и царското вино беше изобилно, според богатството на царот. Пиењето беше слободно: никој не присилуваше, бидејќи царот им беше заповедал на сите свои управници на домот, да постапуваат според волјата на секој.

⁹И царицата Астин исто така приреди гозба за жените во царскиот дом на царот Артаксеркс.

¹⁰На седмиот ден, кога срцето на царот се развесели од виното, тој им рече на Амана, Вазана, Дареја, Вараза, Затолтана, Аватаза и Дарава — седум евнуси, што служеа пред царот Артаксеркс,

¹¹да ја доведат царицата Астин пред царевото лице со царски венец, за да им ја покаже најзината убавина на народите и на кнезовите, зашто таа беше многу убава.

¹²Но царицата Астин не сакаше да дојде според царевата наредба, соопштена преку евнусите.

¹³Царот многу се разгневи, и јароста пламна во него. И им рече царот на мудреците, кои ги познаваа поранешните времиња, — зашто царските дела се вршеа пред сите, што знаеја закон и правда,

¹⁴а негови најблиски тогаш беа: Аркесеј, Сареотеј, и Малисеар, персиски и мидиски кнезови, кои седеа до царот на прво место:

¹⁵»Како да постапиме според законот со царицата Астин, поради тоа што не го исполни зборот на царот Артаксеркс, соопштен преку дворјаните.«

¹⁶Тогаш рече Мухеј пред лицето на царот и на кнезовите: »Не само пред царот е виновна царицата Астин, туку и пред сите кнезови и началници царски;

¹⁷зашто за постапките на царицата ќе дознаат сите жени и ќе почнат да ги запоставуваат мажите свои и да говорат: ‚царот Артаксеркс заповедал да ја доведат пред него царицата Астин, но таа не отишла.‘

¹⁸Сега персиските и мидиските кнегињи, што ќе чујат за постапката на царицата, ќе им го кажат тоа на сите царски кнезови; и ќе има горделивост, а и големи караници.

¹⁹Ако му е на царот угодно, нека издаде царска заповед, што ќе се запише во персиските и мидиските закони и да не се менува, дека Астин нема да излегува веќе пред лицето на царот Артаксеркс, а нејзиното царско достоинство царот да го предаде на друга, подобра од неа.

²⁰Кога ќе чујат за таа царска заповед, која ќе се разнесе по целото негово царство, колку и да е големо, сите жени ќе ги почитуваат мажите свои, од најголем до најмал.«

²¹Тие зборови му се допаднаа на царот и на кнезовите: и царот постапи според зборовите на Мухеја;

²²па испрати до сите царски области писма, напишани за секоја област со писмото нејзино и на секој народ на јазикот негов: секој маж да биде господар на домот свој, и тоа да му се објави на секого на неговиот роден јазик.