Read Свето Писмо (Гаврилова) 1990 Книга Естир 2 Bible Online

Книга Естир 2 - Свето Писмо (Гаврилова) 1990 bible

Книга Естир 2

¹Откако стивна гневот на царот Артаксеркс, тој се сети на Астин и на она, што го направи таа и за решението за неа.

²И рекоа царевите слуги, кои му служеа: »Да се побараат за царот млади и убави девојки,

³а царот да определи во сите области на царството пратеници, што ќе ги соберат сите млади и убави на изглед девојки во престолнината Суза, во женскиот дом под надзор на царскиот евнух Хигеј, чувар на жените, и да им дадат сѐ што е потребно за дотерување.

⁴И која девојка ќе му се свиди на царот, таа да стане царица место Астин.« Му се допаднаа на царот тие зборови, и тој постапи така.

⁵Имаше во престолнината Суза еден Јудеец, по име Мардохеј, син на Јаира, син на Семеја, син Кисеев, од Венијаминовото племе.

⁶Тој беше преселен од Ерусалим со плениците, изведени заедно со јудејскиот цар Јехониј, што го беше преселил вавилонскиот цар Навуходоносор.

⁷Тој ја воспитуваше Адаса — а таа е Естир — ќерка на чичко му, бидејќи таа немаше ни татко ни мајка. Таа девојка имаше тенка става и убаво лице, а по смртта на татко н, Мардохеј ја прибра при себеси место ќерка.

⁸Кога беше објавена заповедта на царот и указот негов, и откога беа собрани многу девојки во престолнината Суза под надзор на Хигеја, тогаш беше земена и Естира во царскиот дом под надзор на Хигеја, чуварот на жените.

⁹Таа девојка му се свиде и ја задоби неговата наклоност, и тој побрза да ѝ даде масла и си, што ѝ припаѓа, и да ѝ определи седум достојни девојки да бидат при неа, во царскиот дом, па ја премести неа и девојките нејзини во најубавото одделение на женскиот дом.

¹⁰Естира не го кажуваше ни народот свој, ни потеклото свое, бидејќи Мардохеј ѝ беше заповедал да не кажува.

¹¹И секој ден Мардохеј доаѓаше во дворот на женскиот дом, за да дознае за дравјето на Естира и што станува со неа.

¹²Кога доаѓаше времето на секоја девојка да влезе при царот Артаксеркс, откако двенаесет месеци по ред беше извршувано над неа сѐ, определено за жените, — зашто за толку време продолжуваа дните на дотерувањето нивно: шест месеци со смирново масло и шест месеци со благопријатни мириси и со други женски работи —

¹³дури тогаш девојката влегуваше при царот. И што и да побараше таа, ќе ѝ дадеа и со тоа одеше од женскиот дом во домот на царот.

¹⁴Вечерта таа влегуваше и утредента се враќаше во друг женски дом под надзор на царскиот чувар на наложниците; и веќе не влегуваше при царот, — освен ако царот ја побараше, и ќе ја повикаа по име.

¹⁵Кога дојде време за Естира, ќерка на Аминадава, чичко Мардохеев, кој ја беше прибрал при себеси место ќерка, — да оди при царот, таа не побара ништо, освен она, што ѝ го кажа царскиот дворјанин Хигеј, чувар на жените. И Естира им се свиде на сите што ја видоа.

¹⁶И беше земена Естира при царот Артаксеркс, во неговиот царски дом, во десеттиот месец, односно во месецот Тевет, во седмата година на царувањето негово.

¹⁷Царот ја засака Естира повеќе од сите жени, и таа ја доби неговата благонаклоност и љубов повеќе од сите девојки; тој ѝ стави на главата царски венец и ја постави за царица место Астин.

¹⁸И царот им приреди голема гозба на сите свои кнезови и слуги при него, — гоштевање поради Естира и им даде олеснувања на областите и раздаде подароци со царска штедрост.

¹⁹И кога вториот пат беа собрани девојките, и Мардохеј седеше при царската врата,

²⁰Естира сѐ уште не говореше за своето потекло и за народот свој, според она како што ѝ беше заповедал Мардохеј; и зборот на Мардохеја го исполнуваше и сега така, како и кога беше при него на воспитување.

²¹Во тоа време, кога Мардохеј седеше пред царската порта, двајцата царски дворјани Гавата и Тара, кои го чуваа прагот, се озлобија поради тоа што беше претпочитан Мардохеј, па размислуваа како да стават рака врз царот Артаксеркс.

²²Кога дозна за тоа, Мардохеј ѝ соопшти на царицата Естира, а Естира му кажа на царот од името на Мардохеја.

²³Работата беше испитана и се утврди дека е тоа вистина, и тие двајцата беа обесени на дрво. И тоа се запиша во книгата на летописот царски.