Read Свето Писмо (Гаврилова) 1990 Книга Естир 6 Bible Online

Книга Естир 6 - Свето Писмо (Гаврилова) 1990 bible

Книга Естир 6

¹Преку ноќта Господ не му даде сон на царот. Затоа му заповеда на слугата да ја донесе книгата за дневните белешки; и ги читаа пред царот;

²и се најде запишано таму, дека Мардохеј беше соопштил за двајцата царски слуги Гават и Тара, кои го чуваа прагот и правеа план да става рака врз царот Артаксеркс.

³Царот запраша: »Каква чест и какво одликување му е дадено на Мардохеја за тоа?« Царевите дворјани, што му читаа одговорија: »Ништо не му е направено.«

⁴Кога царот се распрашуваше за Мардохеевото добро дело, дојде во дворот Аман, и праша царот: »Кој е во дворот?« Аман, пак, тогаш беше дошол во надворешниот двор на царскиот дворец да поразговара со царот, за да го обесат Мардохеја на бесилката што ја беше приготвил за него.

⁵Дворјаните му одговорија на царот: »Ете, Аман стои во дворот.« Царот рече: »Нека влезе.«

⁶И Аман влезе. Царот го праша: »Што да му направам на таков човек кого сакам да го одликувам со почести?« Аман си помисли во срцето: кого друг би посакал царот да го одликува, освен мене?

⁷И Аман одговори: »На таков човек, кого царот сака да го одликува со почести,

⁸нека му донесат царска облека, со која царот се облекува, и да го доведат коњот, на кој царот јава, да му постават царски венец на главата негова,

⁹и нека облеката и коњот, во рацете на еден од првите царски кнезови, да го облечат човекот, кого царот сака да го одликува, да го изведат на коњ на градскиот плоштад и да огласат пред него: Вака му се прави на оној човек, кого царот сака да го одликува со почести!«

¹⁰Тогаш царот му рече на Амана: »Добро рече; веднаш земи ја облеката и коњот, како што рече, и направи му го тоа на Јудеецот Мардохеја, кој седи пред царската порта; ништо да не пропуштиш од тоа, што го кажа.«

¹¹Ги зеде Аман облеката и коњот, го облече Мардохеја, го изведе на коњ на градскиот плоштад и објави пред него: »Вака му се прави на човек, кого царот сака да го одликува со почести!«

¹²Мардохех се врати кај царската порта. Аман, пак, тргна во домот свој, натажен и со наведната глава.

¹³И ѝ раскажа Аман на жената своја Сереса, и на сите пријатели свои за сѐ, што се случило со него. Тогаш мудреците негови и жената негова Сереса му рекоа: »Ако Мардохеј, поради кого ти почна да паѓаш, е од јудејско племе, ти нема да го надвиеш, туку навистина ќе паднеш пред него, бидејќи со него е живиот Бог.«

¹⁴Тие уште разговараа со него, и царските евнуси дојдоа и по поканија Амана да оди на гозбата, што ја беше приготвила Естира.