Read Свето Писмо (Гаврилова) 1990 Исход 1 Bible Online

Исход 1 - Свето Писмо (Гаврилова) 1990 bible

Исход 1

¹А овие се имињата на синовите Израилеви, кои дојдоа во Египет со Јакова, таткото нивни; секој со целото свое семејство дојде.

²Рувим, Симеон, Левиј и Јуда,

³Исахар, Завулон и Венијамин,

⁴Дан и Нефталим, Гад и Асир. А Јосиф, пак, беше во Египет.

⁵И сите, кои произлегоа од Јакова, беа седумдесет и пет души.

⁶Потоа Јосиф умре и сите браша негови, и сиот нивни род;

⁷а синовите Израилеви се народија и се намножија, и беа многу, и се засилија многу, така што земјата се наполни со нив.

⁸Тогаш во Египет се зацари нов цар, кој не знаеше за Јосифа,

⁹и му рече на народот свој: »Еве, народот на синовите Израилеви е многуброен и посилен од нас.

¹⁰Па ајде да ги надмудриме за да не се размножуваат; и, ако настане војна, да не се здружат со непријателите наши и да удрат на нас, па да не си отидат од земјата наша.«

¹¹И поставија над нив надзорници над работите за да ги мачат со работа. Така му ги изградија на Фараонот утврдените градови Питом и Рамзес и Он, наречен сега Илиопол.

¹²Но, колку повеќе ги мачеа, толку повеќе се множеа, и се засилуваа многу, така што се плашеа Египтјаните од синовите Израилеви.

¹³Затоа Египтјаните ги гонеа синивите Израилеви со жестокост,

¹⁴и им го загорчуваа животот со тешки работи, со кал и правење тули, и со секаква работа во полињата, и со сите други работи, ги измачуваа немилосрдно.

¹⁵Освен тоа, царот египетски им се обрати на бабиците еврејски, од кои на едната ѝ беше името Сепфора, а на другата Фуа;

¹⁶и им рече: »Кога ќе бабувате кај Еврејките, и при породувањето, ако видите дека е машко, убијте го, а ако биде женско, запазете го!«

¹⁷Но бабиците се плашеа од Бога и не правеа така, како што им заповеда царот египетски, туку ги оставаа децата од машки пол.

¹⁸А царот египетски ги повика бабиците и им рече: »Зошто правите така и ги оставата машките деца во живот?«

¹⁹А бабиците му одговорија на Фараонот: »Еврејките не се како жените египетски: зашто пред да дојде бабицата, тие веќе родиле.«

²⁰Бог, пак, им превеше на бабиците добро; а народот се множеше и многу се засилуваше.

²¹И бидејќи бабиците се плашеа од Бога, Бог им правеше добро за да преуспеваат во животот.

²²Тогаш му заповеда Фараонот на целиот народ свој, велејќи: »Секое машко кое ќе се роди кај Евреите, фрлете го в река: само женските деца оставајте ги во живот.«