Read Свето Писмо (Гаврилова) 1990 Исход 18 Bible Online

Исход 18 - Свето Писмо (Гаврилова) 1990 bible

Исход 18

¹А Јотор, свештеникот медијамски, тестот Мојсеев, чу за се што направи Господ за Израилот, народот Свој, како го изведе Господ Израилот од Египет.

²И ја зеде Јотор, тестот Мојсеев, Сепфора, жената Мојсеева, која беше ја вратил,

³и двата сина нејзини: на едниот името му беше Гирсам, оти Мојсеј велеше: »Придојден сум во земја туѓа,«

⁴а на вротиот името му беше Елиезер, бидејќи рече: »Бог на таткото мој ми се најде на помош и ме избави од рацете Фараонови.«

⁵И Јотор, тестот Мојсев, тргна со синовите негови и со жената негова при Мојсеја во пустињата, каде што се беше утаборил на планината Божја,

⁶па го известија Мојсеја, велејќи: »Ете, тестот твој Јотор, иде кај тебе, иде и жената твоја, и обата сина нејзини со неа.«

⁷И Мојсеј му излезе во пресрет на тестот свој и му се поклони, и го целива; па откако се поздравија еден со друг, го воведе Мојсеј под шаторот свој.

⁸И му раскажа Мојсеј на тестот свој за се што направи Господ со Фараонот и со сите Египтјани поради Израилците, и за сите тешкотии што ги снајдуваа патем, и како Господ ги избави од рацете Фараонови и од рацете египетски.

⁹И се зарадува Јотор за сите добрини што му ги направи Господ на Израилот, спасувајќи го од рацете на Египтјаните и од рацете Фараонови.

¹⁰Тогаш Јотор рече: »Нека е благословен Господ, Кој ве избави од рацете на Египтјаните и од рацете Фараонови!

¹¹Сега знам дека е Господ поголем од сите богови, и тоа токму во она, со што тие се превознесуваат.«

¹²Потоа Јотор, тестот Мојсеев, Му принесе на Бога сепаленица и жртви. Тогаш дојде и Арон и сите старешини Израилеви, и јаде леб со тестот Мојсеев пред Бога.

¹³А утредента седна Мојсеј да му суди на народот; и сиот народ стоеше пред Мојсеја од утрото до вечерта.

¹⁴И Јотор, гледајќи сѐ што прави со народот, рече: »Што правиш така со народот? Зошто само ти седиш, а сиот народ стои од утро до вечер?«

¹⁵А Мојсеј му одговори на тестот свој: »Народот доаѓа при мене за да бара суд од Бога.

¹⁶Кога ќе им се случи некоја работа, тие доаѓаат при мене, и јас пресудувам помеѓу нив, а има меѓу нив недоразбирања, и им ги кажувам наредбите Божји и Законот Негов.«

¹⁷Но тестот Мојсеев му рече: »Не е добро тоа, што го правиш ти.

¹⁸Ќе се измориш и ти и сиот народ, кој е со тебе; оти таа работа е многу тешка за тебе; ти сам не можеш да ја извршуваш.

¹⁹Туку послушај ме сега и ќе те посоветувам, и Бог ќе биде со тебе; ти биди посредник пред Бога за народот, и работите нивни соопштувај Му ги на Бога:

²⁰Учи ги на наредбите Божји и на законит Негов, и покажувај им го патот Негов, по кој треба да одат и делата што треба да ги вршат.

²¹А ти од сиот народ одбери способни луѓе, кои се плашат од Бога; луѓе справедливи, кои мразат горделивост, па постави ги над нив како илјадници, стотници, педесетници, десетници и писари.

²²Тие нека му судат на народот во секое време и да те известуваат за секое потешко дело; а за сите мали работи тие самите нека пресудат. Така ќе ти биде полесно и тие тебе ќе ти помагаат.

²³Ако го направиш тоа, и Бог ти го одобри тоа, тогаш ќе можеш да истраеш, и сиот тој народ ќе си оди мирно во своето место.«

²⁴И го послуша Мојсеј тестот свој, и направи се, како што му рече.

²⁵И избра Мојсеј од сиот Израил луѓе способни, па ги постави: илјадници, стотници, педесетници и десетници.

²⁶И тие му судеа на народот во секое време, а за тешките работи му кажуваа на Мојсеја; за сите мали работи, пак, судеа сами.

²⁷Потоа го ослободи Мојсеј тестот свој, и тој си отиде во земјата своја.