Read Свето Писмо (Гаврилова) 1990 Исход 19 Bible Online

Исход 19 - Свето Писмо (Гаврилова) 1990 bible

Исход 19

¹Во првиот ден од третиот месец, откако излегоа синовите Израилеви од земјата Египетска, во ден на млад месец, стигнаа во пустињата Синајска.

²Кревајќи се од Рафидин, дојдоа во пустињата Синајска, и се утабори Израил таму спроти гората.

³И Мојсеј се искачи на гората при Бога, и го повика Бог, велејќи: »Кажи му на домот Јаковов, и извести ги синовите Израилеви:

⁴‚Сами видовте што им направив на Египтјаните и како ве изнесов, како на крилја орлови ве приведов при Себе.

⁵Па сега, ако го слушате гласот Мој и го пазите заветот мој, ќе ми бидете народ избран меѓу сите народи, зашто Моја е земјата цела.

⁶И вие ќе ми бидете царство на свештеници и народ свет.‘ Тоа се зборовите, што ќе им ги кажеш на синовите Израилеви.«

⁷Потоа Мојсеј дојде и ги повика старешините народни; и им ги изложи сите овие зборови, што им ги заповеда Господ.

⁸И сиот народ одговори еднодушно и рече: »Се што рекол Господ ќе направиме и ќе послушаме.« Тогаш Мојсеј му ги соопшти на Господа зборовите народни.

⁹А Господ му рече на Мојсеја: »Еве, Јас ќе дојдам кај тебе во столб облачен, за да чуе народот, како ќе зборувам со тебе, па да ти поверува засекогаш.« Оти Мојсеј му ги беше соопштил на Господа зборовите народни.

¹⁰И му рече Господ на Мојсеја: »Слези од гората при народот и објасни им и очисти го денес и утре, и нека ги исперат облеките свои;

¹¹и нека се приготват за третиот ден, зашто во третиот ден ќе слезе Господ на гората Синајска пред сиот народ,

¹²а ќе поставиш граници за сиот народ од сите страни и ќе им кажеш: ‚Пазете да не се качувате на планината и да не се допирате до подножјето нејзино; секој, кој ќе се допре до гората, ќе биде предаден на смрт.

¹³Никаква рака да не се допре до неа, туку со камења да биде убиен или со стрела да биде застрелан; добиток ќе е или човек, жив да не остане. А кога трубата ќе затруби отегнато, кога облакот ќе се крене од планината, тогаш ќе можат да се качат на гората.‘«

¹⁴И Мојсеј слезе од гората кај народот; и го очисти народот, и тие ги испраа облеките свои.

¹⁵И му рече на народот: »Бидете готови и за три дни не приближувајте се до жените!«

¹⁶А третиот ден, пред осамнувањето, загрме и молњи засветкаа, и настана густ облак над гората Синајска, и затруби труба со многу силен глас, така што затрепери сиот народ, кој беше утаборен.

¹⁷Тогаш Мојсеј го изведе народот од таборот, за да Го пресретне Бога, и застана во подножјето на гората.

¹⁸А гората Синајска целата беше во дим, зашто Господ беше слегол над неа во оган; и дим се креваше од неа, како дим од печка, и се уплаши сиот народ;

¹⁹и гласот на трубата стануваше се посилен. Мојсеј зборуваше, а Господ му одговараше гласно.

²⁰И Господ слезе на гората Синајска, на врвот од гората, и го повика Господ Мојсеја на врвот од гората. Мојсеј се искачи.

²¹Тогаш Бог му рече, велејќи: »Слези и кажи му на народот да не навалува за да Го види Господа, та да не изгинат мнозина од нив;

²²а свештениците, кои Му пристапуваа на Господа Бога, нека се осветат, за да не ги погуви Господ.«

²³Тогаш Мојсеј Му рече на Бога: »Не ќе може народот да се качи на планината Синајска, бидејќи Ти изрично не опомена, велејќи — омеѓи ја гората и освети ја.«

²⁴Но Господ му рече: »Оди, слези, па тогаш качете се ти и Арон по тебе; а свештениците, пак, и народот нека не се трукаат да се качат при Господа, за да не ги погуби.«

²⁵И слезе Мојсеј кај народот и им објасни.