Read Свето Писмо (Гаврилова) 1990 Исход 21 Bible Online

Исход 21 - Свето Писмо (Гаврилова) 1990 bible

Исход 21

¹А ова се законите, што ќе им ги објавиш:

²»Ако купиш роб Евреин, шест години нека ти служи, а седмата нека си оди слободен, без откуп;

³ако дошол сам, сам нека си оди; а ако има жена, нека оди и жената со него;

⁴ако, пак, неговиот господар му дал жена, и таа му родила синови или ќерки, жената и децата нека останат на господарот негов, а тој нека си оди сам;

⁵но, ако робот одговарајќи, рече: ‚Го сакам господарот мој, жената моја, и децата мои; не сакам да одам и да бидам слободен.‘

⁶тогаш таквиот господарот негов нека го доведе пред судот Божји и нека го постави пред вратата или на прагот и таму господарот негов да му го продупчи увото со шило, та да му остане вечен роб.

⁷Ако некој ја продаде ќерката своја за робинка, таа да не си оди како што одат робинките;

⁸ако не му се свиди на господарот нејзин, за која ветил дека ќе ја земе за жена, нека ја отпушти. Но нема право господарот да ја продаде на туѓ народ, кога сам ја отфрлил;

⁹ако, пак, ја свршил за синот свој, нека ѝ го даде правото, што го имаат ќерките;

¹⁰ако земе друга за себе, првата не смее да ја лиши од храна, облека и сопружничка должност.

¹¹Не ѝ направи ли една од овие три работи, тогаш нека си оди од него дарум, без откуп.

¹²Кој ќе удри човек и тој умре, со смрт да се казни.

¹³Но, ако тоа не го направи намерно, а Бог допуштил да падне во негови раце, тогаш ќе ти определам место, каде што може да побегне убиецот.

¹⁴Ако некој, пак, намерно го нападне својот ближен, со цел да го убие на измама, и се засолни при жртвеникот Мој, одвлечи го и од жртвеникот Мој, за да умре.

¹⁵Кој ќе го удри таткото свој или мајката своја, да се погуби.

¹⁶Кој го злоставува таткото свој или мајката своја, со смрт да се казни.

¹⁷Ако некој украде некого од синовите Израилеви и го продаде или се најде во негови раце, откако го заробил, со смрт да заврши.

¹⁸Кога двајца мажи се скараат, па еден од нив удри друг со камен или со тупаница, но тој не умре, туку легне во постела,

¹⁹па, кога ќе стане, макар и со стап да се потпира, на оној што удрил нека му е просто; само денгубата да му ја надомести и за лекувањето да плати.

²⁰А кој ќе удри роб свој или робинка своја со стап, и тие умрат од неговата рака, нека биде виновен пред судот;

²¹но, ако тие преживеат ден или два, да не е виновен, бидејќи тие се негов имот.

²²Кога луѓето се бијат, па некој од нив удри бремена жена, така што таа пометне, но не дојде до смрт, да плати глоба, колку ќе определи мажот на жената; а да ѝ плати колку ѝ припаѓа;

²³ако, пак, плодот бил оформен, тогаш нека се даде живот за живот;

²⁴око за око, заб за заб, рака за рака, нога за нога,

²⁵изгоретина за изгоретина, рана за рана, повреда за повреда.

²⁶Ако некој го удри робот свој во окото, или робинката своја во окото, и ги ослепи, да ги пушти на слобода заради окото;

²⁷или, ако му скрши заб на робот свој, или на робинката своја, да ги пушти на слобода заради забот.

²⁸Ако вол убоде маж или жена, па умре, волот да се отепа со камења и месото од него да не се јаде; но господарот на волот нема да биде виновен;

²⁹Но, ако волот бил и порано бодлив, а господарот негов знаел за тоа и не го пазел, па убие маж или жена, волот да се убие со камења, и господарот негов заедно со него да се предаде на смрт.

³⁰Ако, пак, му се наложи откуп за животот свој, нека плати откуп, колку што ќе му се определи.

³¹Син ли прободе или ќерка, со него да се постапи според истиот закон.

³²Прободе ли, пак, волот роб, или робинка, тогаш на господарот нивни да му се платат триесет сикли сребро, а волот да се убие со камења.

³³Ако некој открие јама, или пак ископа јама и не ја покрие, и падне во неа јунец или осел,

³⁴сопственикот на јамата треба да ги надомести; на господарот ќе му даде сребро, а трупот тогаш ќе биде негов.

³⁵Кога нечиј вол смртно убоде вол на друг човек, и тој умре, тогаш да го продадат волот жив и парите да ги поделат, а исто така да го поделат и убиениот вол;

³⁶ако, пак, се знаело од порано, дека волот бил бодлив, и му е кажано на господарот негов, а тој не го пазал, да даде вол за вол, а убиениот нека му остане нему.