Read Свето Писмо (Гаврилова) 1990 Исход 22 Bible Online

Исход 22 - Свето Писмо (Гаврилова) 1990 bible

Исход 22

¹Ако некој украде јунец или овца и ја заколе, или ја продаде, да даде пет јунци за еден јунец и четири овци за една овца.

²Ако се фати крадец, како поткопува и ранет умре, тоа не се смета за убиство.

³Но, ако сонцето веќе се појавило над него, виновен е за крв. И крадецот штетата мора да ја надомести. А, ако нема ништо, тогаш тој треба да биде продаден за својата кражба.

⁴Ако кај фатениот се најде она, што го украл, во неговата рака живо, било осел или овца, да го врати двојно.

⁵Ако некој уништи нива, или лозје, пуштајќи го добитокот свој да пасе во туѓа нива, да ја надомести штетата за целата нива, да надомести со најдоброто од својата нива и најдоброто од своето лозје според плодот од својата нива; ако ја уништи.

⁶Ако се појави оган, па тој го зафати трњето, и се запали гумното, или класјето или нивата, оттогаш оној, кој го предизвикал пожарот, да плати.

⁷Кога некој му даде на ближниот свои пари или предмети на чување, и тие бидат украдени од домот негов, крадецот, ако се фати, ќе плати двојно;

⁸во случај, пак, крадецот да не се фати, тогаш сопственикот на куќата нека се јави пред Бога, па нека се заколне дека тој не посегнал врз имотот на ближниот свој.

⁹За секоја изречена неправда: за јунец, осел, овца, облека, за секој изгубен предмет, за кој некој рече дека е негов, нивниот спор треба да дојде пред Бога: па кого ќе го осуди Бог, тој нека му плати на ближниот двојно.

¹⁰Ако некој му даде на чување на ближниот свој осел, или јунец, или овца, или некој друг добиток, и тој добиток пцовиса, или загине, или, пак, биде запленет, а никој да не го види,

¹¹тогаш меѓу нив нека одлучи клетвата пред Господа, дека оној не посегнал врз имотот на својот ближен, и ако сопственикот така го прими, не се надоместува;

¹²ако, пак, му биде украден, тогаш нека му плати на сопственикот негов.

¹³А ако е изеден од ѕверка, да донесе доказ за тоа и да не плаќа ништо.

¹⁴Ако некој од ближниот свој добие на услуга — живинче, па тоа загине или пцовиса, или биде загинато, а сопственикот не бил со него, ќе мора да се плати;

¹⁵но, ако сопственикот биде со него, да не се плаќа. Ако бил момок, да го плати само наемот.

¹⁶Кој измамил несвршена девојка, и биде со неа, да ја дарува и да ја заме за жена;

¹⁷а ако таткото нејзин одбие и не сака да му ја даде, да одмери сребро на татка ѝ колку што следува за мираз на девојката.

¹⁸Вражачи да не оставате живи.

¹⁹Кој ќе згреши со добитокот, со смрт да се казни.

²⁰Кој принесува жртви на други богови, освен на Единиот Господ, со смрт да се истреби.

²¹На придојден немој да му правиш неправда, ниту да го угнетуваш, зашто и вие бевте придојдени во земјата египетска.

²²Не навредувајте ни вдовици ни сираци;

²³ако ги навредиш и тие, негодувајќи се обрнат кон Мене, ќе го чујам повикот нивни,

²⁴и ќе се распали гневот Мој, па со меч ќе ве убијам, и жените ваши ќе останат вдовици, и децата ваши — сираци.

²⁵Кога на заем ќе дадеш пари на некој сиромашен брат што е при тебе, не присилувај го и не наложувај му лихва.

²⁶Ако земеш во залог облека од пријателот твој, врати му ја до зајдисонце;

²⁷оти таа му е покривка, таа му е едина облека на телото негово: со што ќе спие? И кога ќе повика кон Мене, Јас ќе го чујам, бидејќи сум милостив.

²⁸Немој да ги злоставуваш судиите, ни за старешините на твојот народ да не зборуваш лошо.

²⁹Не воздржувај се да ги принесеш првите плодови од жетвата и лозјето; дај Ми ги првородените од синовите твои.

³⁰Така и со јунецот твој, и со овцата твоја, и со оселот твој; седум дена нека бидат при мајката своја, а во осмиот ден дај Ми ги Мене.

³¹И ќе Ми бидете свет народ. Затоа и месо од растргнато животно да не јадете; фрлај им го на кучињата.«