Read Свето Писмо (Гаврилова) 1990 Исход 29 Bible Online

Исход 29 - Свето Писмо (Гаврилова) 1990 bible

Исход 29

¹»А еве што да направиш над нив, за да ги посветиш за Мои свештеници да Ми свештенодејствуваат: земи теле од говедата и два овна здрави,

²и весквасни лебови, замесени со масло, и питки бесквасни намачкани со масло; од брашно пченично направи ги.

³Стави ги во една кошница, и принеси ги во кошницата, заедно со телето и двата овна.

⁴Доведи го Арона и синовите негови пред влезот на скинијата на сведоштвото, и измиј ги со вода.

⁵А откако ќе ги земеш светите одежди, облечи го Арона, братот твој, во хитон и во ефод, со ефодот и со наградникот и опаши го преку ефодот;

⁶стави му ги на глава кидарот, а на кидарот прицврсти го венецот на светоста.

⁷И земи елеј за помазание, излеј на главата негова и помажи го.

⁸Потоа доведи ги синовите негови и облечи ги во хитоните.

⁹И опаши ги со појаси, и стави им ги кидарите на главата, па свештенството нека им припаѓа вечно. Така ќе ги посветиш рацете на Арона и на неговите синови.

¹⁰Потоа доведи го телето пред врата на скинијата на сведоштвото, и Арон и синовите негови нека ги положат рацете свои врз главата на телето, пред Господа.

¹¹И заколи го телето пред Господа, при вратата во скинијата на сведоштвото,

¹²и земи крв од телето и со твојот прст помажи ги роговите на жртвеникот, а остатокот од крвта, сета излиј ја во подножјето на жртвеникот.

¹³Потоа земи го сиот лој што ја обвива внатрешноста, кошулката на црниот дроб и обата бубрега со лојот околу нив, и запали ги на жртвеникот.

¹⁴А месото од телето, кожата негова и нечистотиите изгори ги на оган надвор од таборот. Тоа е жртва за гревот.

¹⁵Потоа земи го едниот овен, и Арон и синовите негови нека ги положат рацете свои врз главата на овенот;

¹⁶па заколи ги, земи крв од него и со неа полиј го жртвеникот од сите страни;

¹⁷овенот, пак, исечи го на делови, измиј ја внатрешноста и нозете негови во вода, и стави ги расечените делови со главата,

¹⁸и изгори го целиот овен на жртвеникот. Тоа е жртва сепаленица пред Господа за мирис благопријатен, жртва на Господа.

¹⁹Земи го потоа и другиот овен, та Арон и синовите негови нека ги положат рацете свои на главата на овенот;

²⁰заколи ги и земи од неговата крв, па помажи го со неа крајчето од десното уво на Арона, и крајчето на десната рака на Арона, и крајчето и крајот од десното уше на синовите негови, а и палецот на десната рака нивна, и палецот од десната нога нивна; а со крвта, што ќе преостане, попрскај го жртвеникот од сите страни.

²¹Потоа земи од крвта, што е на жртвеникот и елеј за помазание, и попрскај го Арона и одеждите негови, и синовите негови и одеждите нивни — па ќе бидат осветени тој и одеждите негови, и синовите негови и одеждите на синовите негови со него; крвта од овенот излиј ја веднаш на жртвеникот наоколу.

²²Освен тоа, земи лој од овенот и лојта што ја обвива внатрешноста негова, како и кошулката од црниот дроб и обата бубрега и лојта што е на нив, и десната плешка; тоа е овен за посветување;

²³и еден леб со масло, и една питка од кошницата со бесквасни лебови, приложена пред Господа.

²⁴Сето тоа стави го врз рацете на Арона и врз рацете на синовите негови, и принеси го тоа пред Господа како жртва приносна со подигање.

²⁵Потоа земи им го тоа од рацете нивни, и принеси го на жртвеникот, над жртвата сепаленица, за да биде мирисот благопријатен пред Господа: тоа е принос пред Господа.

²⁶И земи ги градите од овенот за Ароновото посветување и донеси ги како жртва приносна пред Господа — и тоа ќе биде твој дел.

²⁷Така ќе ги осветиш градите како жртва вртена и плешките како жртва вознесена, што се оддели од овенот на приносот отсечена за посветување на Арона и на синовите негови;

²⁸и тоа нека биде за Арона и за синовите негови вечен закон од синовите Израилеви, бидејќи тоа е вознесение; тоа вознесение треба да го прават синовите Израилеви при благодарствените жртви; нивното вознесение е дар за Господа.

²⁹А светите одежди Аронови по него нека преминат на синовите негови, за да бидат во нив помазувани и во нив да се посветуваат за свештеници.

³⁰Седум дена нека се облекува во нив великиот свештеник, оној, кој на неговото место ќе биде свештеник од синовите негови, кој ќе влегува во скинијата на сведоштвото за да служи во светилиштето.

³¹А овенот за посветување земи го и месото негово свари го на светото место;

³²и Арон и синовите негови нека го изедат месото од тој овен со лебовите од кошницата при влезот во скинијата на сведоштвото.

³³Нека јадат од она што послужило за нивното посветување, рацете да им бидат исполнети со власт и да бидат посветени; но човек друг да не јаде, зашто тоа е света работа;

³⁴а и ако остане нешто од месото на жртвата за посветување, или од лебовите до изутрина, остатокот изгори го на оган; тоа не треба да се јаде, зашто е осветувано.

³⁵И направи така со Арона и со синовите си онака како што ти заповедав. Седум дена посветувај ги рацете нивни.

³⁶Теле заради гревовите да принесуваш во денот на очистувањето; и да го очистиш жртвеникот, кога осветуваш на него, и помажи го за да биде осветен.

³⁷Седум дена ќе го очистуваш жртвеникот и ќе го осветуваш, и жртвеникот ќе бидеа свјатаја свјатих; секој што ќе се допре до жртвеникот, ќе се освети.

³⁸А еве што ќе принесуваш на жртвеникот: две јагниња здрави од една година, секој ден на жртвеникот жртва без прекин.

³⁹Едното јагне принесувај го наутро, а другото принесувај го навечер;

⁴⁰и уште по една десетина ефа пченично брашно измешано со четврт ин масло, а за преливање — четврт ин вино, за едно јагне;

⁴¹а другото јагне принесувај го навечер: како утринската жртва, и со си за преливање принесувај го, за да биде мирисот благопријатен принос на Бога.

⁴²Тоа нека биде постојана жртва во поколенијата ваши пред вратата од скинијата на сведоштвото пред Господа, каде што ќе ти се јавувам, за да зборувам со тебе.

⁴³И таму ќе им се јавувам на синовите Израилеви, и ќе се осветува местото со славата Моја.

⁴⁴А ќе ги осветам скинијата на сведоштвото и жртвеникот; и Арона и синовите негови ќе ги осветам, за да Ми свештенодејствуваат.

⁴⁵Ќе пребивам меѓу синовите Израилеви и ќе им бидам Бог,

⁴⁶и ќе познаат дека Јас сум Господ, Бог нивни, Кој ги изведов од земјата Египетска за да пребивам меѓу нив. Јас сум Господ, Бог нивни.«