Read Свето Писмо (Гаврилова) 1990 Исход 35 Bible Online

Исход 35 - Свето Писмо (Гаврилова) 1990 bible

Исход 35

¹Потоа го собра Мојсеј целото општество на синовите Израилеви, и им рече: »Еве што заповеда Господ да правите:

²шест дена да се работи, и седмиот ден да ви биде одмор, зашто е света сабота, почивка на Господа; секој што ќе работи во тој ден, со смрт да се казни;

³во ден саботен да не палите оган нигде во жилиштата ваши, Јас сум Господ.«

⁴И уште му рече Мојсеј на целото општество на синовите Израилеви: »Еве што заповеда Господ:

⁵соберете помеѓу вас принос на Господа, секој што од срце дава, нека донесе принос, добороволно нека принесе принос на Господа; злато, сребро и бакар.

⁶сина, црвена и темноцрвена ткаенина, двојно предена, висон ткаен и козина;

⁷и кожи овнешки, црвени, кожи сини и дрво ситим;

⁸масло за светење, и мириси за елеј за помазание и мирисно кадило;

⁹и камен сардиски, и камења за украсување на ефодот и за наградникот.

¹⁰И сите, кои се меѓу вас мудри по срце, нека дојдат да направат си што заповедал Господ:

¹¹Скинијата, завесите и покривот негов, кукичките негови и штиците, напречниците негови, столбовите негови и подножјата негови;

¹²и ковчегот на сведоштвото, и столбовите негови, и завестата на дворот и столбот негов, и камењата смарагдови и мирис.

¹³Трпезата и лостовите нејзини, и лебовите за принос; и жртвеникот и сите сосуди нејзини;

¹⁴светилникот за осветление со приборот негов и кадилата негови, и масло за осветление;

¹⁵и кадилниот жртвеник, и лостовите негови, и елеј за помазание, и кадило миризливо, и завесата на вратата од скинијата;

¹⁶жртвеникот за сепаленици, и огништата негови од бакар, лостовите негови и сите сосуди за него, и мијалникот и подножјето негово.

¹⁷Завесите за дворот, столбовите негови и подножјата нивни, и завесите од вратата на дворот;

¹⁸ковчезите за скинијата, и колчињата за дворот со јажињата нивни;

¹⁹одеждите свети за служба во светилиштето, и светите одежди на свештеникот Арон, и одеждите на синовите негови за свештеничка служба, и елејот за помазание и кадило миризливо.«

²⁰Потоа целото општество на синовите Израилеви се повлече од Мојсеја.

²¹И секој, кој принесе што му срце сакаше срцето го влечеше и душата го поттикнуваше, доаѓаше, носејќи принос на Господа — учеството за градење на шаторот на садови, за секоја служба во него и за сите одежди на светилиштето;

²²доаѓаа мажи и жени; сите, што срцето ги влечеше, принесуваа печати, алчиња, обетки, прстења и веришки, секакви златни работи; секој, кој сакаше, принесуваше злато на Господа;

²³и секој, кој имаше сина, црвена и темноцрвена ткаенина и висон ткаен, кожи овнешки, црвени, и кожи сини, кожи козји принесуваа;

²⁴и секој, кој донесуваше сребро или туч, Му Го принесуваше како дар на Господа; и кој имаше дрво ситим, го принесуваше за секоја потреба.

²⁵А секоја жена, мудра и вешта во рачно предење со своите раце и принесуваа си што ќе испредеа — преѓа сина, црвена и темноцрвена и препредена;

²⁶секоја пак, жена, што ќе наумеше поради умешноста нејзина, предеше козина.

²⁷А старешините принесуваа камен оникс и камења за украсување на ефодот и на наградникот;

²⁸исто така и масло за осветление и мириси за елеј за помазание и за кадило мирисно!

²⁹И така синовите Израилеви — сите мажи и сите жени, што ќе им дојдеше на ум да принесат што и да е за делото, што заповеда Господ преку Мојсеј да се направи, принесоа доброволен дар на Господа.

³⁰Тогаш им рече Мојсеј на синовите Израилеви: »Ете, Бог го повика по име Веселеил, син на Уриј, синот Оров, од племето Јудино.«

³¹и го исполни со Дух Божји, со мудрост и со разум, со знаење и со секоја умешност да гради;

³²да обработува дрводелие, и да прави работи од злато, сребро и бакар;

³³да реже камења, да реже и обраборува дрво, и да прави секакви уметнички работи;

³⁴а вложи во неговото срце и во срцето на Елијава, синот Ахисамахов, од племето Даново, и способност да можат да учат и други.

³⁵Го обдари со умешност да вршат секаква резбарска работа, кројачка, везачка и ткајачка на сина, црвена и темноцрвена ткаенина и на висон, и да изведуваат секакви работи, во разни уметности.