Read Свето Писмо (Гаврилова) 1990 Исход 36 Bible Online

Исход 36 - Свето Писмо (Гаврилова) 1990 bible

Исход 36

¹И направија Веселеил и Елијав и сите способни луѓе, на кои им беше дадена мудрост и знаење да разбираат и да работат секакви работи, потребни за светилиштето, тоа сѐ како што беше заповедал Господ.

²И ги повика Мојсеј Веселеила и Елијава и сите мудри луѓе, на кои Бог им дал разум во срцето, и сите, што од срце сакаа да се зафатат за дела што треба да се свршат.

³И тие ги зедоа од Мојсеја сите дарови што ги беа принеле синовите Израилеви за потребите на светилиштето за да се изработат. А тие ги примаа уште и принесуваните дарови од оние што носеа секое утро.

⁴Тогаш дојдоа сите вешти луѓе, што вршеа работи за светилиштето, секој според својата работа, што сами ја вршеа,

⁵па му рекоа на Мојсеја — »Народот принесува повеќе отколку што е потребно за да се направи, како што заповеда Господ.«

⁶И Мојсеј разгласи во таборот, велејќи: »Ни маж ни жена да не принесува ништо повеќе како дар за светилиштето:« И народот престана да принесува,

⁷зашто имаше доста принесено за секакви работи што требаше да се направат, дури и преостануваше.

⁸Тогаш сите вешти луѓе, кои се обврзаа да ја направат скинијата, приготвија десет платништа од ткаенина со препредена преѓа и од сина, црвена и темноцрвена ткаенина; и на нив направија уметнички извезени херувими.

⁹Должината на секое платниште изнесуваше дваесет и осум лакти, а ширината четири лакти; сите платништа беа со иста мерка.

¹⁰И Веселеил ги состави петте платништа едно со друго, и другите пет платништа ги состави едно со друго.

¹¹И направи сини петлици по рабовите на едното платниште, каде што ќе се соединува со другото; такви направи тој и на работ на последното платниште, за да го соедини со другото.

¹²Педесет петлици направи на едното платниште, каде што се соединува со другото; петлиците беа една спрема друга.

¹³И направи педесет златни кукички и со кукичките состави едно платниште со друго. Така скинијата стана една целина.

¹⁴Потоа направи платниште од козина за покривање на скинијата; единаесет такви платништа направи:

¹⁵едно платниште беше долго триесет лакти, а широко четири лакти; една мерка беа сите единаесет платништа.

¹⁶Па ги состави петте платништа одделно, а шесте платништа одделно.

¹⁷И направи педесет петлици по работ на едното платниште, каде што се соединува со другото, и педесет петлици направи по работ на другото платниште, за да се соединува со другото;

¹⁸а направи и педесет кукички од бакар, за да се состави скинијата, та да стане целина.

¹⁹Потоа направи покривка за скинијата од овнешки кожи, црвени, а над неа друга — од сини кожи.

²⁰И направи диреци за скинијата од дрвото ситим, што ќе стојат исправени;

²¹секој дирек од по десет лакти долг, а лакот и половина широк;

²²секој дирек имаше по два клина, еден спроти друг; така направи тој на секој дирек за скинијата.

²³А вакви диреци за скинијата направи дваесет за јужната страна:

²⁴и направи четириесет подножја сребрени за под дваесетте диреци, по две подножја под секој дирек за двата клина негови, и по две подножја под другиот дирек за двата негови клина.

²⁵И за другата страна на скинијата, спрема север, направи дваесет диреци.

²⁶и четириесет сребрени подножја под нив, по две подножја под секој дирек за двата негови клина, и по две подножја под другиот дирек.

²⁷А за западната страна на скинијата направи шест диреци;

²⁸направи уште два дирека за аглите во скинијата од западната страна;

²⁹тие беа составени одоздола и составени одозгора со по една алка; така направи тој со обете страни на двата агли;

³⁰и така имаше осум диреци и шеснаесет подножја сребрени, по две подножја под секој дирек.

³¹Потоа направи напречници од дрвото ситим: пет за диреците од едната страна од скинијата,

³²и пет напречници за диреците од другата страна на скинијата, и пет напречници за диреците од западната страна на скинијата до обата агли.

³³А направи и средна напречница што ќе иде преку средината на диреците од едниот до другиот крај;

³⁴диреците го опковаа со злато, а и алките, низ кои беа провлечени напречниците, ги направи од злато, па и напречниците го опкова со злато.

³⁵Потоа направи завеса од сина, црвена и темноцрвена ткаенина и од ткаен висон и на неа направи херувими, уметнички извезени;

³⁶за неа направи и четири столба од дрвото ситим, и го опкова со злато; и златни кукички за столбовите и им излеа четири подножја од сребро.

³⁷Направи потоа завеса за влезот во скинијата од сина, црвена и темноцрвена ткаенина и од ткаен висон, уметнички исткаена,

³⁸и пет столбови за неа со кукичките нивни; врвовите на столбовите и нивните прстени ги обложи со злато, и пет подножја од бакар.