Read Свето Писмо (Гаврилова) 1990 Исход 38 Bible Online

Исход 38 - Свето Писмо (Гаврилова) 1990 bible

Исход 38

¹И направи од дрвото ситим жртвеник за жртви сепаленици; пет лакти долг и пет лакти широк, четириаголен, три лакти висок, и ги опкова со бакар;

²а направи и рогови на неговите четири агли, така што роговите да излегуваат од него, и го опкова со бакар.

³И ги направи сите садови за жртвеникот: котлиња, кадилниците, чашките и вилушките, и клештите; сите потреби му ги направи од бакар.

⁴а на жртвеникот му направи решетка од бакар како мрежа на дното, од дното па до средината наоколу;

⁵и излеа четири алки за четирите агли на решетката од бакар, за да се провлечат низ нив лостови за носење.

⁶А лостовите ги направи од дрвото ситим и ги опкова со бакар.

⁷Па ги провлече лостовите низ алките од обете страни на жртвеникот, за да може да се носи; од штици го направи, празен одвнатре.

⁸Направи и мијалник од бакар и подножје од бакар со убави шарки, кои го красеа влезот на скинијата на сведоштвото.

⁹И двор направи од јужната страна, а завесите му беа од ткаен висон, по сто лакти долги;

¹⁰дваесет столбови за нив, и дваесет подножја под нив од бакар; а кукичките за столбовите и лостовите беа од сребро.

¹¹Така и од северната страна, сто на сто лакти; столбови за нив дваесет и подножја под нив од бакар дваесет; а и кукичките за столбовите и лостовите нивни од сребро.

¹²А од западната страна завеси од педесет лакти: десет столбови за нив, и подножја — десет; кукичките за столбовите и лостовите нивни од сребро;

¹³и од источната страна, завеси од педесет лакти.

¹⁴За западната страна на вратата завеси од петнаесет лакти, три столбови за нив и три подножја под нив;

¹⁵и за другата задна страна (отаде и одовде на вратата однадвор) завеси од петнаесет лакти, три столба за нив, и подножја под нив — три.

¹⁶Сите завеси на дворот наоколу беа од ткаен висон.

¹⁷а подножјата од столбовите — од бакар, кукичките за столбовите и лостовите на нив — од сребро; и врвовите нивни беа со сребро обложени; и сите столбови на дворот беа со сребро поврзани.

¹⁸А завесата на вратата од дворот — везена — од сина, црвена и темноцрвена ткаенина и од ткаен висон, долга дваесет лакти, а во висина по ширината пет лакти, како и другите завеси во дворот;

¹⁹и четири столба за нив, и четири подножја под нив од бакар; кукичките им беа од сребро, а врвовите нивни посребрени.

²⁰Сите колчиња околу скинијата и дворот беа од бакар.

²¹Ете, тоа се изработките за скинијата на сведоштвото, направени по заповедта на Мојсеја за левитите а под надзор на свештеникот Итамара, син на Арона.

²²А си она како што му заповеда Господ на Мојсеја, го направи Веселеил, син на Урија, синот Оров, од племето Јудино.

²³И со него Елијав, синот Ахисамахов, од племето Даново, резбар, вешт ткајач и везач на порфирна ткаенина сина, црвена и темноцрвена и на ткаен висон.

²⁴Сето злато, што беше употребено за сите потреби на светилиштето, злато, принесено на дар, беше дваесет и девет таланти и седумстотини и триесет сикли, свештени сикли;

²⁵а среброто преброено од дародавците — сто таланти и илјада седумстотини седумдесет и пет сикли, свештени сикли.

²⁶По половина сикла од човек, пресметано според свештената сикла, од секој што доаѓа на пребројување, од дваесет години и нагоре, од шестотини и три илјади и петстотини и педесет души.

²⁷Сто таланти сребро беа употребени за лиење на подножјата за светилиштето и подножјата за завесите; сто подножја од сто таланти, по талант на подножје;

²⁸а од илјада и седумстотини и седумдесет и петте сикли тој направи кукички за столбовите и опков за врвовите нивни, а направи и лостови за нив.

²⁹А од принесениот дар во бакар имаше седумдесет таланти, и две илјади и четиристотини сикли;

³⁰и од него ги направи тој подножјата за влезот во скинијата на сведоштвото, и жртвеникот од бакар како и решетката од бакар за него, и сите садови за жртвеникот;

³¹подножјата за целиот двор наоколу, подножјата за вратата на дворот, и сите колчиња за скинијата и сите колчиња за дворот наоколу.