Read Свето Писмо (Гаврилова) 1990 Исход 40 Bible Online

Исход 40 - Свето Писмо (Гаврилова) 1990 bible

Исход 40

¹И му рече Господ на Мојсеја велејќи:

²»Во првиот ден од првиот месец подигни ја скинијата на сведоштвото,

³потоа постави го таму ковчегот на откровението и засолни го со завесата;

⁴внеси ја трпезата, и постави си што треба да се намести на неа; внеси го и свеќникот, а стави ги и кандилцата на него;

⁵постави го златниот жртвеник за кадење пред ковчегот на откровението; и закачи завеса пред влезот во скинијата на сведоштвото.

⁶Постави го и жртвеникот за жртви сепаленици, а постави го и пред влезот во скинијата на сведоштвото;

⁷стави го мијалникот меѓу скинијата на сведоштвото и жртвеникот, и налеј вода во него;

⁸огради го дворот наоколу, и закачи ја завесата на вратата од дворот;

⁹па земи елеј за помазание, и помажи ја скинијата и си што има во неа: и освети ја неа и сите принадлежности нејзини, па ќе биде света.

¹⁰Помажи го и жртвеникот за жртви сепаленици и сиот прибор негов, па освети го жртвеникот, и жртвеникот ќе стане пресвет.

¹¹Помажи го и мијалникот, и подножјето негово, и освети го.

¹²Потоа доведи го пред влезот од скинијата на сведоштвото Арона и синовите негови и измиј ги со вода;

¹³облечи го Арона во светите одежди и помажи го и освети го, за да Ми принесува жртви.

¹⁴Доведи ги и синовите негови, и облечи ги во хитони,

¹⁵и помажи ги, како што го помаза таткото нивни, за да Ми принесуваат жртви; и помазанието нивно ќе ги освети за вечно свештенство во нивните поколенија.«

¹⁶И направи Мојсеј сѐ, како што му заповеда Господ, така направи.

¹⁷Во првиот месец од втората година, во првиот ден во месецот се подигна скинијата.

¹⁸Мојсеј ја подигна скинијата: ги исправи диреците, ги провлече напречниците, и ги исправи столбовите;

¹⁹па ги распна платништата над скинијата, а над неа ги ставија покривот одозгора, како што му беше заповедал Господ на Мојсеја.

²⁰И, откако го зеде откровението, го стави во ковчегот, и стави ногалки под ковчегот, па го стави очистилиштето одозгора над ковчегот.

²¹Потоа го внесе ковчегот во скинијата, и ја закачи завесата, та го засолни ковчегот на откровението, како што му беше заповедал Господ на Мојсеја.

²²И ја постави трпезата во скинијата на сведоштвото од северната страна на скинијата, пред завесата;

²³потоа постави на неа лебови за предложение пред Господа, како што му беше заповедал Господ на Мојсеја.

²⁴Го намести свеќникот во скинијата на сведоштвото спрема трпезата, од јужната страна на скинијата,

²⁵а ги постави и кандилцата пред Господа, како што му беше заповедал Господ на Мојсеја.

²⁶Го постави златниот жртвеник во скинијата на сведоштвото пред завесата,

²⁷и стави на него да гори мирисно кадиво, како што му беше заповедал Господ на Мојсеја.

²⁸Ја закачи завесата пред влезот во скинијата;

²⁹потоа го постави и жртвеникот за жртви приносници при влезот во скинијата на сведоштвото, и принесе на него жртва сепаленица, и лебен принос, како што му беше заповедал Господ на Мојсеја.

³⁰Го намести и мијалникот меѓу скинијата на сведоштвото и жртвеникот, и налеа во него вода за миење;

³¹и од него Мојсеј и Арон и синовите негови си ги измија рацете свои и нозете свои;

³²а ги миеја кога влегуваа во скинијата на сведоштвото и кога пристапуваа кон жртвеникот да служат, како што му беше заповедал Господ на Мојсеја.

³³Го огради и дворот околу скинијата и жртвеникот, и ја стави завесата на влезната врата од дворот. Така ја доврши Мојсеј сета работа.

³⁴Тогаш облак ја покри скинијата на сведоштвото и се исполни скинијата со слава Господова;

³⁵и Мојсеј не можеше да влезе во скинијата на сведоштвото, зашто облакот го засенуваше, и славата Господова ја исполнуваше скинијата.

³⁶И кога се креваше облакот од скинијата, тогаш поаѓаа синовите Израилеви на пат со својот имот;

³⁷а кога не се креваше облакот, тогаш ни тие не поаѓаа си до денот, кога ќе се кренеше,

³⁸зашто облакот Господов стоеше над скинијата дење, а ноќе во облакот се појавуваше оган пред очите на целиот дом Израилев, при сите нивни патувања.