Read Свето Писмо (Гаврилова) 1990 Исход 6 Bible Online

Исход 6 - Свето Писмо (Гаврилова) 1990 bible

Исход 6

¹А Господ Бог му рече на Мојсеја: »Еве, ќе видиш што ќе му направам на Фараонот; со рака силна ќе ги пушти; под дејство на рака цврста дури ќе ги истера од земјата своја.«

²И уште му зборуваше Бог на Мојсеја, па му рече: »Јас сум Господ.

³Јас му се јавив на Аврама и Исака и Јакова како ‚Семоќен Бог‘, а со името Мое како ‚Господ‘ не сум им се открил.

⁴И направив завет Свој со нив, дека ќе им ја дадам земјата Хананска: земја, во која беа тие придојдени, и во која живееја како туѓинци.

⁵Ги чув воздишките на синовите Израилеви, кои Египтјаните ги измачуваат, и се сетив на заветот Мој.

⁶Затоа, појди и кажи им на синовите Израилеви, велејќи: ‚Јас сум Господ, ќе ве изведам од египетското насилство, ќе ве избавам од ропството нивно, ќе ве спасам вас удирајќи со силна рака и со суд голем.

⁷Ќе ве земам за свој народ, ќе ви бидам Бог, па ќе познаете дека Јас сум Господ, Бог ваш, Кој ќе ве изведе од Египетската земја.

⁸И ќе ве воведам во онаа земја, за која кренав рака и се заколнав дека ќе му ја дадам на Авраама, на Исака и на Јакова; и ќе ви ја дадам вам во наследство. Јас Господ!‘«

⁹Мојсеј им го кажа тоа на синовите Израилеви, но тие не го послушаа Мојсеја од малодушност и поради тешките работи.

¹⁰Тогаш Господ пак му рече на Мојсеја, велејќи:

¹¹»Влези, кажи му на Фараонот, царот египетски, да ги пушти синовите Израилеви од земјата своја.«

¹²А Мојсеј проговори пред Господа и рече: »Ете, синовите Израилеви не ме послушаа, а како ќе ме послуша Фараонот? А освен тоа, јас сум спор во зборувањето.«

¹³Но Господ им зборуваше на Мојсеја и Арона, и ги задолжи да одат кај синовите Израилеви и кај Фараонот, за да ги пушти синовите Израилеви од земјата Египетска.

¹⁴Ова се старешините на нивните домови: синовите на Рувима, провородениот син Израилев: Енох и Фалус, Асрон и Харми; тоа е племето Рувимово.

¹⁵А синовите Симеонови се: Јемуил, Јамин, Аод, Ахин, Сар и Саул, син на една Хананејка; тоа е племето Сименово.

¹⁶А еве ги имињата на синовите Левиеви, според сродствата нивни: Гирсон, Каат и Мерари. А Левиј поживе сто и триесет и седум години.

¹⁷Синови, пак, Гирсонови беа: Ловениј и Семеј со семејствата нивни.

¹⁸Синови Каатови: Амрам и Исар, Хеврон и Озил. А годините на Катовиот живот беа сто и триесет и три.

¹⁹А синовите Мерариеви се: Молиј и Мусиј. Тоа се семејствата на Левиј според сродствата нивни.

²⁰Амрам се ожени со Јохаведа, братучетката своја, и таа му ги роди Арона и Мојсеја и Маријам, сестрата нивна. Амрам поживе сто триесет и седум години.

²¹Синови, пак, Исарови беа: Кореј, Нафек и Зехриј.

²²Синовите Озилови се: Мисаил, Елисафан и Сегриј.

²³А Арон ја зеде за жена Елисавета, ќерката Аминадавова, сестра Насонова; и таа му ги роди Надава и Авиуда, Елеазара и Ирамара.

²⁴Синови Корееве беа: Асир, Елкан и Авијасаф. Тоа е потомството Кореево.

²⁵И Елеазар, синот Аронов, се ожени со една од ќерките Футилови, и таа му го роди Финеса. Тоа се старешините на Левиевото племе, според нивните семејства.

²⁶А Арон и Мојсеј, тоа се оние, на кои Господ им рече да ги изведат синовите Израилеви од земјата Египетска, си силата на дружините нивни!

²⁷Овие се оние, кои му зборуваа на Фаранонот, царот египетски, за да ги изведат синовите Израилеви од земјата Египеска; тоа се Арон и Мојсеј.

²⁸Во оној ден, кога Господ му говореше на Мојсеја во земјата Египетска,

²⁹и му рече Господ на Мојсеја, велејќи: »Јас сум Господ. Кажи му го на Фараонот, царот египетски, сѐ она што Јас ти го реков!«

³⁰А Мојсеј рече пред Господа: »Еве, недоброречив сум, па како ќе ме послуша Фараонот?«