Read Свето Писмо (Гаврилова) 1990 Јов 10 Bible Online

Јов 10 - Свето Писмо (Гаврилова) 1990 bible

Јов 10

¹и дотегна на душата моја мојот живот; ќе се предадам на тагата своја; ќе говорам со горчината на душата своја.

²Ќе му речам на Господа: »Не ме обвинувај; кажи ми зошто се бориш со мене?

³Мило ли тие е да ме измачуваш, да го презираш делото на рацете Свои, а намерите на нечесните да ги помагаш?

⁴Зар имаш телесни очи? Гледаш ли како што гледа човек?

⁵Зар Твоите дни се како дните на смртните, или Твоите години се како дните на човек,

⁶та бараш порок во мене и бараш грев во мене,

⁷макар што добро знаеш дека сум невин и дека нема кој да ме спаси од раката Твоја?

⁸Твоите раце ме создале и ме оформиле, и Ти сега од сите страни ме поништуваш?

⁹Сети се дека како глина си ме замешал, та пак ли во прав ќе ме претвориш?

¹⁰Нели Ти ме излеа како млеко, и ме згусти како сирење?

¹¹Со кожа и плот ме облече, со коски и жили ме стегна,

¹²живот и милост ми дарува, и Твојат грижа го чуваше духот мој?

¹³Но и тоа во срцето Свое го криеше, знам дека тоа е во Тебе,

¹⁴дека, ако згрешам, Ти ќе забележиш и нема да го оставиш гревот мој без казна.

¹⁵Ако сум виновен, тешко ми мене! Ако сум прав, не ќе смеам да кренам глава. Од срам сум скршен, гледајќи ја маката своја.

¹⁶Ако се исправам, како лав ме гониш, силата Своја на мене ја покажуваш со чудеса.

¹⁷Обвинувања нови подигаш против мене; го засилуваш гневот Свој против мене; со нови сили се креваш против мене.

¹⁸И зошто ме изведе од утробата? Да бев умрел кога ничие око уште не ме беше видело;

¹⁹о, да бев пренесен од утробата во гроб, како да ме немало!

²⁰Нели се малку деновите мои? Остави ме уште малку да се радувам,

²¹пред да појдам на пат без враќање — во земјата на темнината и смртната сенка,

²²во земјата на густата темнина, каде што нема уредба, каде што светлината е слична на најцрната ноќ.«