Read Свето Писмо (Гаврилова) 1990 Јов 13 Bible Online

Јов 13 - Свето Писмо (Гаврилова) 1990 bible

Јов 13

¹Ете, сето тоа окото мое го виде, увото мое го чу и го забележав за себеси.

²Колку што знаете вие, знам и јас; не сум подолу од вас.

³Но јас кон Вседржителот би сакал да говорам, би сакал со Бога да се соочам.

⁴А вие сте ковачи на лаги; сите вие сте бескорисни лекари.

⁵О, само да бевте молчеле! Тоа би ви се сметало за мудрост.

⁶Ислушајте ги моите расудувања и проникнете во изразот на устата моја.

⁷Требаше ли да говорите заради Бога неправда и заради Него да говорите лага?

⁸Требаше ли да бидете лицепријатни кон Него и за Бога така да се препирате?

⁹Добри ли ќе биде, Он да ве испитува? Ќе Го измамите ли како што го измамуваат човекот?

¹⁰Он строго ќе ве казни, иако скришно лицемерите.

¹¹Зар големината Негова не ве плаши, и страв од Него не ве обзема ли?

¹²Вашите забелешки прилегаат на пепел; вашата одбрана е глинена ограда.

¹³Молкнете пред мене, а јас ќе говорам, што и да ме снајде.

¹⁴Зар јас самиот да си го раскинувам со забите телото свое? И душата своја да си ја ставам в рака?

¹⁵Ете, Он може да ме убие, но јас ќе се надевам; би сакал само однесувањето мое пред лицето Негово да го оправдам.

¹⁶И тоа ми е веќе за спасение, бидејќи безбожник нема да се јави пред лицето Негово.

¹⁷Ислушајте ги внимателно зборивите мои и објасненијата мои со ушите ваши.

¹⁸Ете, започнав судска постапка; знам дека ќе бидам прав.

¹⁹Кој има сила да ме надвие? Потоа ќе молкнам и ќе го испуштам духот.

²⁰Само две работи не прави со мене, и тогаш јас нема да се кријам од Твоето лице;

²¹тргни ја од мене раката Своја, и Твојот ужас да не ме потресува.

²²Тогаш прашувај ме, и јас ќе одговарам; или јас да прашувам, а Ти да одговараш.

²³Колку се пороците и гревовите мои? Покажи ми го беззаконието мое и гревот мој.

²⁴Зошто го криеш сега лицето Свое од мене и ме сметаш за Твој непријател?

²⁵Зошто со страв го мачиш од ветрот скинатиот лист, зошто ја гониш сувата сламка?

²⁶Зошто пишуваш против мене горчливи пресуди и ми ги сметаш гревовите на младоста моја,

²⁷ги тураш во клада нозете мои и ги демнеш сите мои патишта, — ги испитуваш трагите на нозете мои?

²⁸Животот мој како изгниено дрво се распаѓа, како облека од молци изедена.«