Read Свето Писмо (Гаврилова) 1990 Јов 15 Bible Online

Јов 15 - Свето Писмо (Гаврилова) 1990 bible

Јов 15

¹Проговори Елифаз од Темна и рече:

²»Ќе одговара ли мудриот со празни знаења и ќе го полни ли стомакот свој со врел ветар?

³Ќе се оправдува ли со бескорисни зборови, и со зборови, што немаат никаква сила?

⁴Ти пак го заборави стравот од Бога; пред Неговото лице ти трепет немаш.

⁵Твоите зборови вината Твоја ја покажуваат, се служиш со јазикот на лукавите.

⁶Тебе те обвинува устата твоја, а не јас; јазикот твој говори против тебе.

⁷Зар ти си првиот роден од човек и пред ридовите ли си создаден?

⁸Зарем си ги слушал тајните Божји и за сѐ мудрост си придобил?

⁹Што знаеш ти, што ние не го знаеме? Што разбираш ти, а што го нема и во нас?

¹⁰Меѓу нас има и седокоси, и старци, коишто според деновите го надминуваат татко ти.

¹¹Зар се за тебе малку Божјите утехи? И Неговите благи зборови?

¹²Кон што те соблазнува срцето твое, кон што така гордо гледаш?

¹³Зошто го устремуваш против Бога духот свој и со устата своја изнесуваш такви зборови?

¹⁴Што е човек, та да биде чист и родениот од жена да биде праведен?

¹⁵Ете, Он и на светите Свои не се доверува, и небесата се нечисти во Неговите очи:

¹⁶толку повеќе е нечист и разтлеен човекот, којшто го пие беззаконието како вода.

¹⁷Јас ќе ти говорам, слушај ме; ќе ти раскажам она што сум видел,

¹⁸што го слушале мудрите и не го сокриле слушнатото од татковците свои,

¹⁹на кои им била дадена оваа земја, каде туѓинец никогаш не стапнал.

²⁰Нечесниот се мачи себеси преку сите свои денови, годините му се одброени на потисникот;

²¹звук од ужас секогаш е во ушите негови; додека мирува, погубникот налетува на него.

²²Не се надева да се спаси од темнината; пред себеси гледа меч.

²³За парче леб скита постојано; знае дека е сосема близу денот на неговата смрт.

²⁴Го плаши нуждата и теснотијата; го надвива; како цар, готов за бој,

²⁵затоа што кревал рака против Бога и Му се противел на Вседржителот,

²⁶се спуштал против Него со гордост, зад дебелите свои штитови;

²⁷затоа што го покрил лицето со маста своја и ги здебелил бедрата свои.

²⁸И тој се населува во разурнати градови, во куќи, каде што не се живее; и што приготвил за себе други ќе однесат.

²⁹Тој нема да се збогати, и имотот негов нема да напредува; ниту поседот негов ќе се рашири по земјата.

³⁰Нема да избега од темнината; пламен ќе ги исуши ветките негови, и со дување пламен од уста ќе изчезне.

³¹Заблудениот нека не ѝ се доверува на суетата, затоа што суетата ќе биде и платата негова.

³²Тој предвреме ќе умре, и ветките негови никогаш нема да се зеленеат.

³³Ќе го фрли тој како лоза неузреаното грозје свое, како маслинка ќе го истресе цветот свој.

³⁴Така ќе опустее домот на нечестивиот, и оган ќе ги голтне шаторите на поткупништвото.

³⁵Тој зачна зло и роди лага, во утробата негова подготвува измама.«