Read Свето Писмо (Гаврилова) 1990 Јов 17 Bible Online

Јов 17 - Свето Писмо (Гаврилова) 1990 bible

Јов 17

¹»Дишењето ми ослабна; дните мои гаснат; гробишта има пред мене.

²Да не беше нивниот потсмев, тогаш и покрај нивните приговори окото мое ќе беше спокојно.

³Заштити ме, заложи се Сам за мене пред Себе! Инаку, кој ќе се заложи за мене?

⁴Зашто Ти го затвори срцето нивно за да не можат да разбираат, и затоа нема да им дозволиш да ликуваат.

⁵Кој им го дели на пријателите свои имотот свој, на неговите деца очите им истечуваат.

⁶Он ме прави приказ кај луѓето и секој може в лице да ми плукне.

⁷Окото мое од тага ми потемне, а рацете и нозете од слабост ми треперат.

⁸Праведните ќе се зачудат на тоа и невините ќе негодуваат против беззакониците.

⁹Но праведникот ќе се држи цврсто за својот пат, и чистиот во рацете сѐ повеќе и повеќе ќе се зацврстува.

¹⁰Вратете се сите вие и одете си; нема да најдам мудар меѓу вас.

¹¹Дните мои изминаа; мислите мои — тежина на срцето мое — се разбиени.

¹²Во ноќта најцрна нов ден се приближува, се приближува светлината што темнината ја гони.

¹³А мојата надеж е да појдам во гроб и таму во темнина да ја постелам постелата своја;

¹⁴на гробот ќе му речам: ти си ми татко, а на црвот — ти си мајка и сестра.

¹⁵Каде е надежта моја? И кој некогаш ќе го види доброто што го очекувам?

¹⁶Ќе слезе таа во пеколот и заедно во правот ќе почива со мене.«