Read Свето Писмо (Гаврилова) 1990 Јов 21 Bible Online

Јов 21 - Свето Писмо (Гаврилова) 1990 bible

Јов 21

¹Одговори Јов и рече:

²»Ислушајте го внимателно зборот мој; тоа ќе ми биде утеха од вас.

³Потрпете ме, и јас ќе говорам; а потоа, откако ќе се искажам, потсмевајте се.

⁴Зар на човек се оплакувам јас? Па како да не биде жалосен духот мој?

⁵Погледајте ме и ужаснете се, и ставете прст на устата своја.

⁶Само кога ќе помислам, — истрпнувам, и трепет го обзема телото мое.

⁷Зошто беззакониците живеат, достигнуваат старост, и собираат богатство?

⁸Децата нивни се со нив пред лицето нивно, и внуците им се пред очите нивни.

⁹Куќите им се во мир и без страв, и жезалот Божји не е врз нив.

¹⁰Бикот нивни оплодува и не пропушта, кравата нивна зачнува и не пометнува.

¹¹Ги пуштаат малите свои како стадо, и децата нивни скокаат.

¹²Подвикнуваат при тимпани и гусли и се веселат со свирки;

¹³ги поминуваат деновите во добро и во еден миг слегнуваат во гроб.

¹⁴А меѓутоа, Му велат на Бога: — ‚Отстрани се од нас, не сакаме да знаеме за Твоите патишта!

¹⁵Што е Вседржителот, та да му служиме? И каква полза има да прибегнуваме кон Него?‘

¹⁶Гледаш, доброто нивно не е од нивните раце. — Но далеку е од мене советот на нечестивите!

¹⁷Често згаснува светилката кај беззакониците и ги сполетува зло, а Он во гневот Свој ги дарува со страдања?

¹⁸Тие треба да бидат како сламка пред ветар и како плева, завеана од виор.

¹⁹Ќе речеш: ‚Бог го чува злото негово за неговите деца. — Нека му воздаде Он на него самиот, за да го знае тој тоа.‘

²⁰Нека очите негови го видат злото негово; и сам нека пие од гневот на Вседржителот.

²¹Зашто, што му е грижа за домот негов, кога бројот на месеците негови ќе се сврши?

²²Но Бога ли ќе Го учиме на мудрост кога им суди на горните?

²³Еден умира во најголема сила своја, сосема спокоен и мирен;

²⁴внатрешнината му е полна со маст, и коските му се напоени со мозок.

²⁵Друг, пак, умира со огорчена душа, без да вкуси добро.

²⁶И еден до друг лежат во земјата и црви ги покриваат.

²⁷Ги знам вашите мисли и судови, што ги кроите против мене.

²⁸Вие велите: ‚каде е кнезовиот дом, каде е шаторот, во кој живеат беззакониците?‘

²⁹Зар не сте ги распрашувале патниците и не сте запознаени ли со нивните забележувања,

³⁰дека во денот на смртта безбожникот бива поштеден; во денот на гневот се одведува настрана?

³¹Кој ќе му го прекори пред лицето негово неговиот пат, и кој ќе му врати за она што го вршел тој?

³²Го спроведуваат до гробиштата и во гробот свој останува тој.

³³Лесни се за него земјените грутки; по него одат многу луѓе, а оние што отишле пред него број немаат.

³⁴Како тогаш сакате да ме утешите со суета? Во одговорите ваши останува само измама.«