Read Свето Писмо (Гаврилова) 1990 Јов 22 Bible Online

Јов 22 - Свето Писмо (Гаврилова) 1990 bible

Јов 22

¹Проговори тогаш Елифаз од Темна и рече:

²»Зар човек може да му биде користен на Бога? Човекот сам за себеси е мудар.

³Се радува ли Вседржителот затоа што си праведен? И ќе има ли корист за Него, затоа што ги држиш непорочни патиштата Негови?

⁴Зар Он, плашејќи се од тебе, ќе влезе во борба со тебе, ќе појде ли да се суди со тебе?

⁵Навистина, твојата злоба е голема, и беззаконијата твои крај немаат.

⁶Навистина, ти земаше залог од браќата свои за ништо и на полуголи им ги соблекуваше алиштата нивни.

⁷На измачен од жед не му даваше вода, да се напие, а на гладен леб му откажуваше;

⁸а на силен човек му даваше земја, и повидниот се населуваше на неа.

⁹Вдовиците ги испраќаше без ништо, и сираците ги оставаше со празни раце.

¹⁰Затоа околу тебе има стапици, и неочекуваниот ужас те збунува.

¹¹Темнина е околу тебе, во која ништо не гледаш и голема вода те покрива.

¹²Бог не ли е повисоко од небесата? Погледај ги горе ѕвездите, колку се високо тие!

¹³И ти велиш: ‚што знае Бог?‘ Може ли Он да суди во мрак?

¹⁴Облаците се Негови завеса, така што не гледа, туку само оди по небесниот кург.

¹⁵Зар ти не одиш по патот на старите, по кој оделе беззакониците,

¹⁶а кои предвреме беа истребени, кога водата се беше разлеала под основите нивни?

¹⁷Тие му велеа на Бога: ‚отстрани се од нас! Што ќе ни направи Вседржителот?‘

¹⁸Он ги полнеше со богатство куќите нивни. — Но далеку да е од мене советот на нечестивите!

¹⁹Ќе видат праведници и ќе се радуваат, а непорочните ќе им се потсмеваат.

²⁰Зар не пропадна имотот нивни, а остатокот оган го гори.

²¹Зближи се со Него — и ќе бидеш спокоен; преку тоа ќе ти дојде доброто.

²²Прими го од устата Негова законот и стави ги зборовите Негови во срцето свое.

²³Ако се обрнеш кон Вседржителот, одново ќе се средиш; ќе го отстраниш беззаконието од шаторот свој

²⁴и ќе ја фрлиш драгоценоста во прав, и по поточните камења — офирско злато.

²⁵Вседржителот ќе биде за тебе помошник, ќе те направи чист како блескаво сребро.

²⁶Зашто тогаш ќе се радуваш за Вседржителот, ќе го кренеш лицето свое кон Бога.

²⁷Ќе Му се молиш, и Он ќе те чуе, и ти ќе ги исполниш заветите свои.

²⁸Ќе наумиш нешто, и тоа ќе се исполни, над твоите патишта ќе свети светлина.

²⁹Кога некој ќе биде понизен, ќе речеш: ‚угоре!‘ и Он ќе го спаси оној со наведнатото лице;

³⁰ќе го спаси и виновниот; а ќе го спаси преку чистотата на твоите раце.«