Read Свето Писмо (Гаврилова) 1990 Јов 36 Bible Online

Јов 36 - Свето Писмо (Гаврилова) 1990 bible

Јов 36

¹И пак продолжи Елијуј и рече:

²»Стрпи се малку, ќе ти покажам, зашто има уште нешто да кажам за Бога.

³Ќе го почнам зборот мој од далеку и ќе ти покажам дека мојот Создател е справедлив,

⁴навистина зборовите мои не се лага: пред тебе е оној, кој исправно мисли.

⁵Ете, Бог е моќен, но никого не презира; силен е со крепкото срце Свое;

⁶не ги поддржува безбожниците, а угнетените ги оправдува;

⁷не ги отстранува очите Свои од праведниците, но заедно со царевите ги става засекогаш на престол; и тие се воздигаат.

⁸Ако, пак, се оковани во вериги и се држат во оковите на неволјата,

⁹тогаш им ги напомнува делата нивни и беззаконијата нивни, бидејќи се умножиле.

¹⁰Го отвора увото нивно за вразумување, им вели да се оттргнат од беззаконието.

¹¹Ако послушаат и почнат да Му служат, ќе ги поминат дните свои во добро и годините свои во радост;

¹²Ако, пак, не послушаат, гинат од стрела и умираат во безумие.

¹³Но лицемерните имаат во срцето свое гнев и не се обрнуваат кон Него, кога ги врзува во окови;

¹⁴затоа душата нивна умира во млади години, и животот нивни згаснува со блудници.

¹⁵Он го спасува страдалникот од маката негова и, кога е угнетен, му го отвора увото.

¹⁶И тебе би те извел Он од теснината на широко, каде што нема угнетување; и трпезата твоја би била полна со мрс;

¹⁷Ако си заслужил суд безбожнички, судот веќе и осудувањето ќе те снајдат.

¹⁸Да не те порази Божјиот гнев со казна! Голем откуп нема да те избави.

¹⁹Нема да гледа на Твоето богатство, ниту на златото, ниту на какво и да било сокровиште твое.

²⁰Не воздивнувај за онаа ноќ кога народите се истребуваат на местото свое.

²¹Пази се, не подавај се на нечестието, што си претпочитал пред страдањето.

²²Бог е најголем со силата Своја; кој учител, како Него?

²³Кој Му Го одреди патот Негов? Кој може да Му каже: ‚постапуваш ли неправедно?‘

²⁴Не заборавај да ги величаш делата Негови, кои луѓето ги гледаат.

²⁵Сите луѓе можат да ги видат; човек може да ги види и оддалеку.

²⁶Ете, Бог е голем, и ние не можеме да Го познаеме; бројот на годините Негови е неиспитан.

²⁷Он ги стега водните капки; тие лијат дожд од облаците Негови;

²⁸капат од облаците и се изливаат изобилно врз луѓето.

²⁹И кој може да го разбере ширењето на облаците, трескотот во шаторот Негов?

³⁰Ете, Он ја распростира врз нив светлината своја и го покрива морското дно.

³¹Оттаму Он ги суди народите, дава храна во изобилие.

³²Он крие во дланките Свои молња и ѝ заповеда кого да удри.

³³Грмењето дава знак да се знае за неа; и добитокот чувствува што станува.«