Read Свето Писмо (Гаврилова) 1990 Јов 4 Bible Online

Јов 4 - Свето Писмо (Гаврилова) 1990 bible

Јов 4

¹Одговори Елифаз од Темна и рече:

²»Ако се обидеме да ти проговориме, нема ли да ти биде тешко? Но кој може да се воздржи да не говори!

³Ете, ти мнозина си советувал и си поткрепувал изнемоштени раце,

⁴твоите зборови го исправале оној што паѓал, си ги поткрепувал раслабените колена.

⁵А сега злото дојде до тебе, и ти изнемоште; допре до тебе, и ти падна со духот.

⁶Твојата богобојзаливост не треба ли да биде твоја надеж, и непорочноста на твоите патишта — твојата поткрепа?

⁷Спомни си, загинал ли некој невин, и кога праведните биле искоренувани?

⁸како што сум гледал: оние што ораат нечесност и сеат зло, тоа и го жнеат;

⁹од здивот Божји загинуваат и од духот на гневот негов исчезнуваат.

¹⁰Рикањето на лавот и гласот на оној што вика замолчува, а забите на лавчињата се кршат;

¹¹силниот лав загинува кога нема плен, лавчињата на лавицата се распрснуваат.

¹²И, ете, до мене скришно долета збор, и увото мое долови нешто од него.

¹³Среде размислувањата за ноќните виденија, кога сонот ги обзема луѓето,

¹⁴мене ме опфаќа страв и трепет и ги растресе сите мои коски.

¹⁵И духот помина над мене; косата ми се крена.

¹⁶Тој застана, — но јас не го видов лицето негово, — само облик беше пред очите мои; тивко веење, и чув глас:

¹⁷‚Зар човекот е поправеден од Бога? И почист ли и од својот Создател?‘

¹⁸Ете, Он и на слугите Свои не им верува и во ангелите Свои согледува недостатоци:

¹⁹дотолку повеќе кај оние, што живеат во земјани куќи, чии основи се од прав и кои пропаѓаат и од молец.

²⁰Меѓу утрото и вечерта тие се растураат; нема ни да забележиш како исчезнале наполно.

²¹не загинуваат ли со нив и достоинствата нивни? Тие умираат иако не станале мудри.«