Read Свето Писмо (Гаврилова) 1990 Јов 6 Bible Online

Јов 6 - Свето Писмо (Гаврилова) 1990 bible

Јов 6

¹Одговори Јов и рече:

²»О, да беа точно измерени маките мои, и заедно со нив да го бев ставил на терезија страдањето мое!

³Тие навистина би биле потешки од морскиот песок! Затоа зборовите ми се жестоки.

⁴Стрелите на Вседржителот се во моето тело; духот мој го пие отровот нивни; ужасите Божји се управија против мене.

⁵Рика ли див осел при трева? Мука ли бик над крмата своја?

⁶Се јаде ли блуткавото без сол и има ли вкус белката од јајцето?

⁷До она до кое душата моја не сакаше да се допре, тоа ми е сега храна во болеста.

⁸О, да се беше остварела желбата моја, и Бог да го исполнеше очекувањето мое!

⁹О, да сакаше Бог да ме сотре, да ме млатнеше со раката Своја и да ме истребеше!

¹⁰Тоа би ми била вистинска утеха, иако горам од мојата безмилосна болест, бидејќи не се откажав од зборовите на Светиот.

¹¹Колку ми е силата, та да се надевам на себе самиот? И каков е крајот, та да го продолжувам животот мој?

¹²Камена сила ли е силата моја? И од бакар ли е телото мое?

¹³Има ли во мене помош за мене, има ли за мене некоја поткрепа?

¹⁴Кој одбива милост кон ближниот свој — ако тој не престанал да се бои од Севишниот Бог.

¹⁵Но моите браќа ме напуштија, како безводни потоци и како бранови ме одминаа

¹⁶Како снег и мраз што се топат од толина и не се познава што имало.

¹⁷Во време сушно тие намалуваат, а во време на жеги исчезнуваат од местата свои.

¹⁸Го менуваат правецот на патиштата свои, навлегуваат во пустињата и се губат;

¹⁹погледнуваат кон нив патниците од Темна, им се надеваат на оние што одеа во Сева,

²⁰но остануваат посрамени во својата надеж: одат таму и црвенеат од срам.

²¹Така сте и вие сега спрема мене: видовте страотија и се исплашивте.

²²Ви рекова ли: дајте ми, или подајте ми нешто од вашиот вишок;

²³избавете ме од раката душманска, откупете ме од раката на мачителите?

²⁴Научете ме, и јас ќе замолчам, покажете ми во што сум згрешил.

²⁵Колку се силни искрените зборови! Но што кажуваат вашите прекори?

²⁶Мислите ли зборовите мои да ги изобличите? Во ветар ги фрлате зборовите ваши?

²⁷Го напаѓате сиромавиот и му копате јама на пријателот свој.

²⁸Но, ве молам, погледнете ме: зборувам ли лага пред вашето лице?

²⁹Разгледајте по правда? — јас сум исправен.

³⁰Има ли во јазикот мој неправда? Зар грлото мое не може да го разликува лошото?«