Read Свето Писмо (Гаврилова) 1990 Псалми 105 Bible Online

Псалми 105 - Свето Писмо (Гаврилова) 1990 bible

Псалми 105

¹Славете Го Господа, зашто е благ, зашто Неговата милост е вечна.

²Кој ќе ја искаже силата на Господа, кој ќе ја извести сета похвала Негова?

³Блажени се оние што го чуваат законот и вршат правда во секое време.

⁴Сети се на нас, Господи, во благоволението Свое кон Твојот народ; посети нѐ со Твоето спасение,

⁵за да ги видиме во добрини Твоите избраници, за да се развеселат со веселбата на Твојот народ, за да се пофалат заедно со Твоето наследство.

⁶Згрешивме ние со татковците наши, правевме беззаконија, вршевме неправда.

⁷Нашите татковци во Египет не ги разбраа Твоите чудеса, не ги помнеа многуте милост Твои и се побунија кога се приближија до Црвеното Море.

⁸Но Он ги спаси заради името Свое, за да им ја покаже силата Своја.

⁹Му се закани на Црвеното Море, и тоа се исуши; и ги преведе по бездните како по пустиња;

¹⁰и ги спаси од рацете на оние што ги намразија и ги избави од рацете на непријателите.

¹¹Водите ги покрија нивните непријатели; не остана ниеден од нив.

¹²И тие поверуваа на зборовите Негови и Му испеаја похвала.

¹³Но побрзаа, ги заборавија делата Негови, не го дочекаа Неговото решение;

¹⁴се занесоа од похотливоста во пустињата, па Го искушуваа Бога во безводната земја.

¹⁵Он го исполни нивното барање, он прати пораз за душите нивни.

¹⁶Му позавидоа на Мојсеја во логорот и на Арона, светецот Господов.

¹⁷Се отвори земјата, го голтна Датан и ја покри дружината Авиронова.

¹⁸И пламна оган врз нив, и пламенот ги изгори грешниците.

¹⁹Направија теле на Хорив и му се поклонија на идолот.

²⁰Ја заменија својата славасо образ на теле, што јаде трева.

²¹Го заборавија Бога, својот Спасител, Кој изврши големи дела во Египет,

²²чудесни во Хамовата земја, страшни при Црвеното Море.

²³И рече дека ќе ги истреби, но Мојсеј, Неговиот избраник, се застапи за нив во пукнатината, за да ја отстрани јароста Негова, та да не ги погуби.

²⁴Тие ја презреа саканата земја, не Му веруваа на зборот Негов;

²⁵и роптаа во шаторите свои, не го слушаа гласот Господов.

²⁶Он крена рака против нив, за да ги погуби во пустињата,

²⁷да го расее нивното семе меѓу народите и да ги растури по земјите.

²⁸Тие се придружија кон Ваал — Фегор и јадеа жртви, принесувани на бездушните,

²⁹Го дразнеа Бога со делата свои, и на нив падна погибел.

³⁰Но стана Финес и Го умилостиви и поморот престана.

³¹И тоа му се прими за правда од род во род довека.

³²И Го разгневија Бога при водите на расправија, кај Мерива, и Мојсеј настрада заради нив,

³³зашто тие го преогорчија духот негов, и тој згреши со устата своја.

³⁴Не ги истребија народите, за кои им беше рекол Господ,

³⁵туку се смешаа со незнабожците и свикнаа на нивните дела;

³⁶им служеа за нивните идоли, а тоа беше соблазна за нив,

³⁷и ги жртвуваа синовите свои и ќерките свои на бесовите;

³⁸и приливаа невина крв, крвта на синовите свои и на ќерките свои, што им ги жртвуваа на ханаските идоли, за земјата се извалка од таа крв;

³⁹се осквернија со делата свои, блудствуваа со постапките свои.

⁴⁰Се разгоре гневот на Господа против Неговиот народ, и Му омрзна наследството Негово,

⁴¹па ги предаде во рацете на непријателите и завладеаја над нив оние што ги мразеа.

⁴²Непријателите нивни ги притеснуваа, и тие се смируваа под нивната рака.

⁴³Многупати ги избавуваше, но тие Го лутеа со упорноста своја, па беа понижувани поради своите беззаконија.

⁴⁴Но Он погледна на нивната жалост, кога ги слушаше нивните молби,

⁴⁵си спомна на Својот завет со нив, се сожали поради големата милост Своја;

⁴⁶па разбуди сострадание спрема нив кај оние што ги беа заробиле.

⁴⁷Спаси нѐ, Господи, Боже наш, и собери нѐ од незнабожците, за да го славиме Твоето свето име, да се фалиме со Твојата слава!

⁴⁸Нека е благословен Господ, Бог Израилев, отсекогаш досекогаш! И сите луѓе нека велат: Амин! Амин! Алилуја.