Read Свето Писмо (Гаврилова) 1990 Псалми 113 Bible Online

Псалми 113 - Свето Писмо (Гаврилова) 1990 bible

Псалми 113

¹Кога Израилот излезе од Египет, домот Јаковов — од туѓ народ,

²Јудеја стана Божјо светилиште, Израилот област Негова.

³Морето виде и избега; Јордан се врати назад.

⁴Горите се разиграа како овни, и ритчињата — како јаганца.

⁵Што ти стана тебе море, па бегаш, и тебе, Јордане, па назад се враќаш?

⁶Зашто се разигравте, гори, како овни, и вие, ритчиња, како јаганца?

⁷Трепери земјата пред лицето на Господа, пред лицето на Бога Јаковов,

⁸Кој камен претвора во водно езеро и карпа — во воден извор.

⁹Не нам, Господи, не нам, туку на Своето име дај му слава, заради Твојата милост, заради Твојата вистина,

¹⁰да не речат незнабожците: »Па каде е нивниот Бог?«

¹¹Нашиот Бог е горе на небото; на небесата и на земјата врши сѐ, што сака.

¹²А идолите на незнабожците се сребро и злато, дело на човечки раце:

¹³уста имаат а не зборуваат, очи имаат но не гледаат;

¹⁴имаат уши, но не слушаат; имаат ноздри, но не мирисаат;

¹⁵раце имаат, но не пипаат; нозе имаат, но не одат; тие не пуштаат глас од грлото свое.

¹⁶Слични на нив нека бидат оние што ги прават, такви и оние што се надеваат на нив.

¹⁷Доме Израилев, надевај се на Господа; Он е наш помошник и заштитник.

¹⁸Доме Аронов, надевај се на Господа; Он е наш помошник и заштитник.

¹⁹Оние кои се бојат од Господа, се надеваат на Господа; он е нивни помошник и заштитник.

²⁰Господ се сеќава на нас и нѐ благословил, го благословил домот Израилев, го благословил домот Аронов,

²¹ги благословил оние, кои се бојат од Господа, мали и големи.

²²Нека ви придаде Господ вам повеќе, вам и на вашите деца.

²³Благословени да сте од Господа, Кој го создаде небото и земјата.

²⁴Небото е Господово небо, а земјата Он им ја даде на синовите човечки.

²⁵Не мртвите ќе Те слават, Господи, ниту оние, што слегуваат во ад,

²⁶туку ние живите ќе го благословуваме Господа отсега и засекогаш.