Read Свето Писмо (Гаврилова) 1990 Псалми 118 Bible Online

Псалми 118 - Свето Писмо (Гаврилова) 1990 bible

Псалми 118

¹Блажени се непорочните во патот нивни, зашто одат според законот Господов.

²Блажени се оние кои ги пазат сведоштвата Негови и од си срце Го бараат.

³Оние кои не вршат беззаконие, тие одат по Неговите патишта.

⁴Ти заповеда да се пазат Твоите заповеди.

⁵О, да се беа управиле моите патишта за да ги чувам Твоите заповеди!

⁶Тогаш немаше да се засрамам, гледајќи ги сите Твоие заповеди.

⁷Ќе Те славам Господи со чисто срце, кога ќе ги научам Твоите праведни судови.

⁸Ќе ги пазам Твоите заповеди; не оставај ме сосема.

⁹Како младичот ќе го запази во чистота патот свој? — Ако ги пази зборовите Твои.

¹⁰Со сето срце мое Те побарав, не отстранувај ме од Твоите заповеди.

¹¹Ги сокрив во срцето свое заповедите Твои, за да не грешам пред Тебе.

¹²Благословен си Ти, Господи! Научи ме на Твоите наредби.

¹³Со устата своја ги разгласив сите судови од устата Твоја.

¹⁴По патот на Твоите сведоштва се насладувам како во секое богатство.

¹⁵Ќе размислам за Твоите заповеди и ќе го разберам патот Твој.

¹⁶Од наредбите Твои ќе се поучувам, нема да ги заборавам Твоите зброви.

¹⁷Покажи милост кон Твојот слуга, и ќе живеам и ќе ги пазам Твоите зборови.

¹⁸Отвори ги очите мои, и ќе ги разберам чудесата од Твојот закон.

¹⁹Придојден сум на земјава, не сокривај ги од мене Твоите заповеди.

²⁰И копнее душата моја во секое време да ги сака Твоите судови.

²¹Им се закани на горделивите; проклети да се оние, кои се отклонуваат од Твоите заповеди.

²²Отстрани го од мене прекорот и презирот, зашто ги засакав Твоите сведоштва.

²³Кнезовите седат и ме клеветаат, а Твојот слуга размислува за Твоите наредби.

²⁴Сведоштвата, пак, Твои се поука моја, а наредбите Твои — советници.

²⁵Душата моја лежи во прав: оживи ме според зборот Твој.

²⁶Патиштата мои ги кажав, и Ти ме чу; научи ме на Твоите наредби.

²⁷Вразуми ме да го разберам патот на Твоите наредби и јас ќе размислувам за Твоите чудеса.

²⁸Душата моја засолзи од тага, зацврсти ме со зборовите Твои.

²⁹Отстрани го од мене патот на неправдата и помилуј ме со законот Твој.

³⁰Го избрав патот на вистината, и не ги заборавив Твоите судови.

³¹Се приврзав за сведоштвата Твои, Господи: не ме посрамувај.

³²Ќе побрзам по патот на Твоите заповеди, кога ќе го рашириш срцето мое.

³³Покажи ми го, Господи, патот на Твоите наредби и ќе се придржувам за нив до крај.

³⁴Вразуми ме, и ќе се држам за законот Твој и ќе го пазам со сето срце свое.

³⁵Постави ме на патеката на Твоите заповеди, зашто многу ја засакав.

³⁶Приклони го срцето мое кон Твоите сведоштва, а не кон лакомства.

³⁷Сврти ги очите мои за да не гледам суета: оживи ме на Својот пат.

³⁸Во слугата Свој внеси збор Свој за да се бои од Тебе.

³⁹Отстрани го од мене прекорот, од кој се плашам, зашто Твоите судови се благи.

⁴⁰Ете, ги засакав Твоите заповеди: Оживи ме според Својата правда.

⁴¹И нека милоста Твоја, Господи, пријде на мене, и спасение од Тебе според зборовите Твои, —

⁴²и јас ќе им одговорам на оние што ме навредуваат, зашто се надевам на зборовите Твои.

⁴³Не одземај го сосема од устата моја словото на вистината, зашто јас се надевам на Твоите судови.

⁴⁴И ќе го чувам Твојот закон засекогаш и во веки веков.

⁴⁵Ќе одам слободно, зашто ги барам Твоите заповеди.

⁴⁶И ќе зборувам за сведоштвата Твои пред царевите, и нема да се посрамам;

⁴⁷и ќе се поучувам на Твоите заповеди, кои многу ги засакав;

⁴⁸ќе ги протегнам рацете свои кон Твоите заповеди, кои ги возљубив, и ќе размислувам за Твоите наредби.

⁴⁹Внуши слово кон Твојот слуга, со кое си му дал надеж.

⁵⁰Таа ме утешува во неволјата моја, оти Твоето слово ме оживува.

⁵¹Горделивите го престапија законот многу, но јас не се отстранив од Твоите закони.

⁵²Се сетив за Твоите вечни судови, Господи, и се утешував.

⁵³Тага ме обзема од грешниците што го напуштаат Твојот закон.

⁵⁴Наредбите Твоими беа песна кога патувам во некое место.

⁵⁵Ноќе го споменувам името Твое, Господи, и го пазам законот Твој.

⁵⁶Он стана мој, зашто ги пазам Твоите заповеди.

⁵⁷Дел мој си Ти, Господи, — си реков — ќе го пазам законот Твој.

⁵⁸Му се помолив на лицето Твое од сѐ срце: помилуј ме, според словото Твое.

⁵⁹Размислувам за Твоите патишта и ги свртувам нозете мои кон Твоите сведоштва.

⁶⁰Се подготвив и не се збунив да ги запазам Твоите заповеди.

⁶¹Замки од грешници ме опкружија, но јас не го заборавив Твојот закон.

⁶²На полноќ станував да те величам поради Твоите праведни судови.

⁶³Јас сум меѓу оние, што се бојат од Тебе и кои ги пазат Твоте наредби.

⁶⁴Со Твојата милост, Господи, земјата е полна; научи ме на Твоите наредби.

⁶⁵Добрини си му направил, Господи, на Твојот слуга според Твоето слово.

⁶⁶Научи ме на добро и на разумно, зашто верувам на Твоите наредби.

⁶⁷Пред моето страдање јас прегрешив; а сега го пазам Твојот збор.

⁶⁸Ти си добар, Господи, и поради добрината Твоја научи ме на Твоите наредби.

⁶⁹Се зголеми неправдата од гордите врз мене, но јас од сѐ срце ќе ги пазам Твоите заповеди.

⁷⁰Се засири срцето мое како млеко; но јас се утешувам со Твојот закон.

⁷¹Добро ми е што ме смири, за да се научам на Твоите наредби.

⁷²Законот на Твојата уста за мене е подобар отколку илјадници злато и сребро.

⁷³Твоите раце месоздадоа и изградија: вразуми ме, и ќе се научам на Твоите заповеди.

⁷⁴Оние, кои се бојат од Тебе, кога ќе ме видат ќе се зарадуваат, затоа што се надевав на Твоите зборови.

⁷⁵Знам, Господи, дека Твоите судиви се праведни, и според справедливоста Твоја Ти ме казни.

⁷⁶Па нека ми биде милоста Твоја утеха, според Твоето слово кон Твојот слуга.

⁷⁷Нека пријде на мене Твојата штедрост, и јас ќе живеам, зашто законот Твој е утеха моја.

⁷⁸Нека се посрамат горделивите, зашто неправедно и без вина ме обвинуваат.

⁷⁹Нека се обрнат кон мене, они што се плашат од Тебе и кои ги знаат Твоите сведоштва.

⁸⁰Нека биде срцето моенепорочно во Твоите наредби, та да не се посрамам.

⁸¹Копнее душата моја за Твоето спасение; јас се надевав на Твоите зборови.

⁸²Очите мои попуштија од желба за Твоето слово велејќи: кога ќе ме утешиш?

⁸³Заштостанав како мев на мраз, но Твоите наредби не ги заборавив.

⁸⁴Колку се дните на Твојот слуга? Кога ќе извршиш суд над моите гонители?

⁸⁵Законопрестапниците се подигруваат со мене спротивно на Твојот закон.

⁸⁶Сите Твои заповеди се вистина. Неправедно ме гонат: помогни ми!

⁸⁷За малку ќе ме убиеја на земјата, нојас не ги оставив Твоите заповеди.

⁸⁸Според Твојата милост оживи ме, и јас ќе ги пазам сведоштвата од Твојата уста.

⁸⁹Твоето слово, Господи, е засекогаш утврдено на небото;

⁹⁰Твојата вистина е од род во род. Ти си ја поставил земјата, и таа стои.

⁹¹Според Твоја волја постои денот. Сѐ што постои, Тебе ти служи.

⁹²Да не беше Твојот закон утеха за мене, јас ќе загинев во неволјата своја.

⁹³Никогаш нема да ги заборавам Твоите наредби, зашто преку нив ме оживуваш.

⁹⁴Твој сум јас, спаси ме, зашто ги барав Твоите наредби.

⁹⁵Грешниците настојуваа да ме убијат, но јас ги разбрав сведоштвата Твои.

⁹⁶Го видов крајот на секое совршенство, но Твоите заповеди се безгранични.

⁹⁷Колку го засакав, Господи, Твојот закон; секој ден се поучувам од него.

⁹⁸Со Својата заповед Ти ме направи помудар од непријателите мои, зашто таа е секогаш со мене.

⁹⁹Станав поразумен од сите учители мои, зашто сведоштвата Твои се моја поука.

¹⁰⁰Поумен станав од старците, зашто ги сакам Твоите заповеди.

¹⁰¹Ги задржувам нозете свои од секаков лош пат, за да го пазам словото Твое.

¹⁰²Од твоите судови нема да се откажам, зашто Ти ме учиш.

¹⁰³Колку се слатки за грлото мое зборовите Твои, послатки се од мед во устата моја.

¹⁰⁴Преку твоите заповеди станав разумен; затоа го замразив секој пат на неправда.

¹⁰⁵Твоето слово е светилник на нозете мои и светлина за патеката моја.

¹⁰⁶Се заколнав и реков да ги пазам Твоите праведни судови, и ќе ги исполнувам.

¹⁰⁷Многу сум нажален, оживи ме, Господи, поради Твоето слово.

¹⁰⁸Затоа, благослови, Господи, да примиш доброволна жртва од мојата уста, и научи ме на Твоите судови.

¹⁰⁹Душата ми е постојано во Твојата рака, но Твојот закон не го заборавив.

¹¹⁰Грешниците ми поставија замка, но јас не се отстранив од Твоите заповеди.

¹¹¹Твоите сведоштва ги примив како вечно наследство, зашто тие се голема радост за срцето мое.

¹¹²Го натерав срцето свое да ги извршува наредбите Твои како вечно оправдание.

¹¹³Престапниците на законот ги замразив, но Твојот закон го сакам.

¹¹⁴Ти си мој помошник и мој заштитник: на Твојата слава се надевам.

¹¹⁵Иставете се од мене беззаконици, за да ги испитам заповедите на мојот Бог.

¹¹⁶Застапи се според Твоето слово, и јас ќе живеам; не посрамувај ме во надежта моја;

¹¹⁷помогни ми, и ќе се спасам: и во Твоите наредби постојано ќе се учам.

¹¹⁸Ти ги презираш оние, кои отстапуваат од Твоите наредби, зашто нивните мисли се неправедни.

¹¹⁹Сите грешници земни ги сметам како престапници, затоа засекогаш ги засакав Твоитесведоштва.

¹²⁰Од страв пред Тебе трепери телото мое, и од Твоите судови се плашам.

¹²¹Јас вршев суд и правда; не предавај ме на оние што ми чинат неправда.

¹²²Прими го Твојот слуга за негово добро, та да не ме клеветат горделивите.

¹²³Очите ми копнеат, очекувајќи го спасението од Тебе, и словото на Твојата правда.

¹²⁴Постапи со Твојот слуга според милоста Своја и научи ме на Твоите наредби.

¹²⁵Слуга Твој сум јас: вразуми ме и ќе ги познаам сведоштвата Твои.

¹²⁶Време е, Господи, да се дејствува: Твојот закон го разурнаа.

¹²⁷Затоа ги засакав заповедите Твои и од топаз и од злато повеќе.

¹²⁸Затоа се управував според сите Твои заповеди и патот на неправдата го замразив.

¹²⁹Прекрасни се Твоите сведоштва: затоа душата моја ги испитуваше.

¹³⁰Објавувањето на Твоите зборови ги просветува и вразумува младите.

¹³¹Ја отвори устата моја и воздивнав, зашто жеден сум за Твоите заповеди.

¹³²Погледај кон мене и помилуј ме, како што се постапува со оние, кои го сакаат Твоето име.

¹³³Утврди ги стапките мои според Твоето слово и не допушти со мене да овладее никакво беззаконие.

¹³⁴Избави ме од човечко клеветење и ќе ги пазам Твоите заповеди,

¹³⁵озари го Твојот слуга со светлината на лицето Твое, и научи ме на Твоите заповеди.

¹³⁶Од очите мои потоци извори солзи, зашто не го запазив Твојот закон.

¹³⁷Праведен си Ти, Господи, и праведни се Твоите пресуди.

¹³⁸Твоите сведоштва, што си ги дал, се засновани на правда и вечна вистина.

¹³⁹Ревноста моја ме јаде, зашто непријателите мои ги заборавија Твоите слова.

¹⁴⁰Твоето слово е многу чисто, и Твојот слуга го сака.

¹⁴¹Мал сум и презрен, но Твоите наредби не ги заборавив.

¹⁴²Твојата правда е вечна правда, и Твојот закон е вистина.

¹⁴³Скрб и мака ме обзедоа; Твоите заповеди се моја поука.

¹⁴⁴Правдата на Твоите сведоштва е вечна; вразуми ме, и ќе живеам.

¹⁴⁵Те призивам со сето срце мое, услиши ме, Господи, — и ќе ги пазам наредбите Твои.

¹⁴⁶Тебе Те повикувам: спаси ме, па ќе ги пазам Твоите слова.

¹⁴⁷Ја испреварувам зората и викам: на Твоето слово се надевам.

¹⁴⁸Очите мои се отворија пред утринската стража, за да се поучам на Твоите слова.

¹⁴⁹Чуј го мојот глас, според милоста Своја, Господи; според Твојот суд оживи ме.

¹⁵⁰Се приближија оние, што сакаат беззаконие; од законот Твој тие се оддалечија.

¹⁵¹Близок си Ти, Господи, и сите Твои заповеди се вистина.

¹⁵²Одамна знам за твоите сведоштва, кои си ги утврдил засекогаш.

¹⁵³Погледај на мојата потиштеност и избави ме, зашто не го заборавив Твојот закон.

¹⁵⁴Пресуди според мојата правда и заштити ме; заради словото Твое оживи ме.

¹⁵⁵Далеку е спасението од грешниците, зашто тие не ги побараа Твоите наредби.

¹⁵⁶Голема е Твојата милост, Господи, според Твојот суд оживи ме.

¹⁵⁷Многумина ме гонеа и мачеа, но од Твоите сведоштва јас не отстапив.

¹⁵⁸Видов неразумни и тешко ми беше, зашто словата Твои не ги запазија.

¹⁵⁹Гледаш како ги засакав заповедите Твои, оживи ме, Господи, поради Твојата милост.

¹⁶⁰Вистината е основа на Твоите слова; и вечен е секој суд на Твојата праведност.

¹⁶¹Кнезовите ме гонеа без вина, но срцето мое се уплаши само од Твоите зборови.

¹⁶²Се радувам на Твоето слово, како оној кој нашол големо благо.

¹⁶³Ја замразив неправдата и се гнасам од неа; а Твојот закон го засакав.

¹⁶⁴Седумпати на ден Те прославувам за судовите на Твојата правда.

¹⁶⁵Голем е мирот кај оние, кои го сакаат Твојот закон, и за нив нема соблазна.

¹⁶⁶Го чекав спасението од Тебе, Господи, и Твоите заповеди ги засакав.

¹⁶⁷Душата моја ги пази Твоите сведоштва, и јас многу ги засакав.

¹⁶⁸Ги пазам Твоите заповеди и Твоите сведоштва, зашто сите мои патишта се пред Тебе, Господи.

¹⁶⁹Нека се приближи пред Тебе молбата моја, Господи; вразуми ме според Твоите зборови.

¹⁷⁰Нека барањето мое дојде пред Тебе; избави ме според Твоето слово.

¹⁷¹Од устата моја нека се произнесе похвала, кога ќе ме научиш на Твоите наредби.

¹⁷²Јазикот мој нека ги разгласи Твоите зборови, зашто сите Твои заповеди се праведни.

¹⁷³Нека ми биде Твојата рака на спасение, зашто Твоите заповеди ги избрав.

¹⁷⁴Копнеев, Господи, за спасение од Тебе и Твојот закон е мојата поука.

¹⁷⁵Ќе живее душата моја и ќе Те слави; и Твоите судови нека ми помогнат.

¹⁷⁶Се заблудив како загубена овца: побарај го Твојот слуга, зашто не ги заборавив Твоите заповеди.