Read Свето Писмо (Гаврилова) 1990 Псалми 136 Bible Online

Псалми 136 - Свето Писмо (Гаврилова) 1990 bible

Псалми 136

¹Крај реките вавилонски — таму седевме и плачевме, кога ќе се сетевме на Сион;

²на врбите, среде Вавилон, ги закачивме нашите харфи.

³Зашто таму, оние што нѐ заробија и кои нѐ одведоа, побараа од нас радосна песна, велејќи ни: »Пејте ни од песните сионски!«

⁴Како да запееме Господова песна на туѓа земја?

⁵Ако Те заборавам тебе, Ерусалиме, — нека ме заборави мојата десница,

⁶нека се залепи јазикот мој за непцето мое, ако не те помнам, ако не го поставам Ерусалим над секоја моја радост.

⁷Сети се, Господи, на синовите Едомови, во денот на Ерусалим, кога тие говореа: »Разрушете, разрушете го до темелите негови!«

⁸Ќерко вавилонска, опустошителко, блажен е оној, што ќе ти врати за делото што ни го направи!

⁹Блажен е оној што ќе ги заграби и ќе ги разбие од камен децата твои.