Read Свето Писмо (Гаврилова) 1990 Псалми 20 Bible Online

Псалми 20 - Свето Писмо (Гаврилова) 1990 bible

Псалми 20

¹Господи, со Твојата сила ќе се весели царот и за спасението од Тебе безмерно ќе се радува.

²Ти му даде, она што срцето негово посака, и молбата на устата негова не ја отфрли,

³зашто Ти го пресретна со добри благослови, му возложи на главата венец со скапоцени камења.

⁴Тој побара од Тебе живот, а Ти му даде долголетие во веки веков.

⁵Голема е славата негова поради спасението од Тебе; Ти го покри со чест и величие.

⁶Ќе положиш на него вечен благослов, развеселувајќи го со радоста на лицето Твое,

⁷зашто царот се надева на Господа и во милоста на Севишниот не се сомнева.

⁸Раката Твоја ќе ги најде сите Твои непријатели, десницата Твоја ќе ги најде сите што Те мразат.

⁹Кога ќе се разгневиш, ќе ги направиш како огнена печка; гневот Господов ќе ги погуби, и оган ќе ги проголта.

¹⁰Ти ќе го уништиш плодот нивни од земјата, и семето нивно — меѓу човечките синови,

¹¹зашто смислија против Тебе зло, се договорија, но не можеа ништо да направат.

¹²Ти ќе ги поставиш како цел, а од Твоите лакови ќе пуштиш стрели во лицето нивно.

¹³Издигни се, Господи, со Твојата сила: ние ќе ја воспеваме и ќе ја прославуваме Твојата моќ.