Read Свето Писмо (Гаврилова) 1990 Псалми 33 Bible Online

Псалми 33 - Свето Писмо (Гаврилова) 1990 bible

Псалми 33

¹Ќе го благословувам Господа во секое време; похвала за Него секогаш има во мојата уста.

²Со Господа ќе се фали душата моја! Нека го чујат тоа кротките и нека се зарадуваат.

³Возвеличете Го Господа со мене, и заедно да го превознесуваме името Негово.

⁴Го побарав Господа, и Он ме чу и од сите опасности мои ме избави.

⁵Пристапете Му и ќе се просветите, и лицата ваши нема да се посрамат.

⁶Кога несреќниот вика, — Господ го услишува и го спасува од сите негови беди.

⁷Ангел Господов застанува околу оние, кои се бојат од Него, и ги спасува.

⁸Вкусете и ќе видите, колку е благ Господ! Блажен е оној човек, кој на Него се надева!

⁹Бојте се од Господа, сите праведници Негови, зашто ништо нема да им недостига на оние кои се плашат од Него.

¹⁰Осиромашеа и огладнеа богатите, а оние што Го побараа Господа, не ќе бидат лишени од секакви добра.

¹¹Дојдете, чеда, послушајте ме: јас ќе ве научам да се боите од Господа.

¹²Сака ли човек да живее и да види добри денови,

¹³нека си го воздржува јазикот од зло и устата своја од лаги,

¹⁴нека се клони од зло и нека прави добро; да бара мир и да врви по него.

¹⁵Очите на Господа се обрнати кон праведниците, и ушите Негови — кон молитвите нивни.

¹⁶Но лицето на Господа и против оние што вршат зло; ќе го истреби од земјата споменот за нив.

¹⁷Повикаа праведниците, и Господ ги услиши и ги спаси од сите маки нивни.

¹⁸Блиску е Господ до оние со скрушено срце, и смирените по дух ќе ги спаси.

¹⁹Бројни се маките на праведниците, но од сите нив Господ ќе ги избави.

²⁰Господ ги чува сите коски нивни; ниедна од нив нема да се строши.

²¹Зла смрт го снаоѓа грешникот, а оние, што го мразат праведниот, ќе загинат.

²²Господ ќе ги спаси душите на слугите Свои, и никој од оние, кои се надеваат на Него, нема да погрешат.