Read Свето Писмо (Гаврилова) 1990 Псалми 38 Bible Online

Псалми 38 - Свето Писмо (Гаврилова) 1990 bible

Псалми 38

¹Си реков: ќе пазам на патиштата мои, за да не згрешам со јазикот свој; се погрижив устата моја да е претпазлива додека е грешникот пред мене.

²Онемев и се смирив, и замолкнав дури и за доброто; и јадот мој се обнови.

³Пламна срцето мое во мене и додека размислувам оган ќе се разгори во мислите мои. Проговорив со јазикот свој:

⁴кажи ми го, Господи, мојот крај, и колкав е бројот на моите дни, за да знам колку сум ништожен.

⁵Ете, Ти си ми дал дни колку една педа, и векот мој е како ништо пред Тебе. И навистина, сѐ е суета, секој човек што живее.

⁶Навистина, човек оди како сенка и залудно се возбудува; собира богатство, а не знае кому ќе му го остави.

⁷И сега што да очекувам? Зар надежта моја не е во Тебе, Господи?

⁸Спаси ме од сите беззаконија; си допуштил да бидам поруга на безумниот.

⁹Занемев и не ја отворив устата, зашто Ти ме создаде.

¹⁰Отстрани ги од мене ударите Твои, изнемоштувам од Твојата силна рака.

¹¹Преку казни заради беззаконија си го воспитал човекот и душата негова си ја расточила како пајажина. И залудно се возбудува секој човек.

¹²Услиши ја, Господи, молитвата моја и почуј ја молбата моја; небиди безгласен како моите солзи, зашто сум туѓ во Тебе и придојден, како сите мои татковци.

¹³Допушти ми да здивнам, пред да заминам и да ме нема веќе.