Read Свето Писмо (Гаврилова) 1990 Псалми 41 Bible Online

Псалми 41 - Свето Писмо (Гаврилова) 1990 bible

Псалми 41

¹Како што кошутата жеднее по водни извори, така и душата моја, Боже, копнее по Тебе!

²Душата моја жедува за силниот и живиот Бог: кога ќе дојдам и ќе се јавам пред лицето Божјо?

³Солзите мои беа леб за мене и дење и ноќе, кога секој ден ми зборуваа: каде е твојот Бог?

⁴Се сетив на тоа и ја излив душата своја, зашто ќе поминам низ места каде што е чудесната скинија — до Божјиот дом — при гласно воскликнување и прославување, како на голем празник.

⁵Зошто тагуваш, душо моја, и зошто толку ме вознемируваш? Надевај се на Бога, бидејќи јас не Него се надевам, мојот Бог е мое спасение.

⁶Се возбуди душата моја во мене, поради тоа ќе си спомнувам на Тебе до земјата Јорданска, од Ермон и од гората мала.

⁷Бездна повикува бездна со гласот на Твоите водопади; сите Твои води и Твои бранови навалија на мене.

⁸Дење Господ ќе ја покажува милоста Своја, а јас ноќе ќе Му пеам и ќе Му се молам на Бога на мојот живот.

⁹Ќе му речам на Бога: Ти си мој застапник. Зошто ме заборави? Зошто одам нажален додека непријателот ме притискува?

¹⁰Трошејќи ги коските мои, непријателите мои се подигруваат со мене, велејќи ми секој ден: каде е твојот Бог?

¹¹Зошто тагуваш, душо моја, и зошто ме вознемируваш? Надевај се на Бога, бидејќи Него јас пак ќе Го прославувам, мојот Бог е моето спасение.