Read Свето Писмо (Гаврилова) 1990 Псалми 49 Bible Online

Псалми 49 - Свето Писмо (Гаврилова) 1990 bible

Псалми 49

¹Бог над боговите, Господ, говори и ја повикува земјата од сончевиот изгрев до запад.

²Од Сион, кој е врв на убавината, ќе се појави Бог;

³иде нашиот Бог, и ќе прозбори; пред Него оган ќе се разгори, околу Него бура.

⁴Одозгора Он ќе ги повика небото и земјата, за да му суди на Својот народ:

⁵Соберете ги при Него светиите Негови, кои се заветуваа како жртва за Него.

⁶И небесата ќе ја огласат Неговата правда, зашто Бог е судија.

⁷Чуј, народе Мој, и Јас ќе ти говорам, Израиле, ќе сведочам против тебе: Јас сум Бог, Твој Бог.

⁸нема да те прекорувам поради твоите жртви; твоите сепаленици секогаш се пред Мене;

⁹нема потреба да примам телци од твојот дом, ниту козли од стадата твои,

¹⁰зашто Мои се сите горски ѕверови и добитокот по горите и говедата.

¹¹Ги познавам сите птици небески, и убавината на полињата е пред Мене,

¹²ако огладнам, нема да ти кажам тебе, зашто Моја е вселената и сѐ, што ја исполнува.

¹³Зар Јас да јадам јунешко месо и да пијам крв јарешка?

¹⁴Принеси Му на Бога благодарствена жртва и на Севишниот молитвите свои упатувај Му ги;

¹⁵и повикај Ме во тежок ден; Јас ќе те избавам, и ти ќе Ме прославиш.

¹⁶А за грешникот Бог рече: »Зошто ги кажуваш Моите наредби и со уста го примаш Мојот завет?«

¹⁷А самиот ја мразиш поуката Моја и зад грб го фрлаш зборовите Мои?

¹⁸Кога ќе видеше крадец, се зближуваше со него и со прељубници се дружеше;

¹⁹устата твоја е полна со злоба, и јазикот твој лукавство плете;

²⁰седиш и го клеветиш братот свој, и против синот на својата мајка се соблазнуваш.

²¹Ти го изврши тоа, а јас молчев; ти си помисли дека Јас сум, каков што си ти. Ќе те изобличам и ќе ти ги изнесам пред лицето твое гревовите твои.

²²Разберете го ова вие, кои го заборавате Бога, за да не ве грабне, па тогаш ќе нема избавител.

²³Кој принесува жртва благодарствена, тој Ме прославува, и кој го следи Мојот пат, нему ќе му го соопштам Божјото спасение.