Read Свето Писмо (Гаврилова) 1990 Псалми 56 Bible Online

Псалми 56 - Свето Писмо (Гаврилова) 1990 bible

Псалми 56

¹Смилуј се, Боже, на мене. Смилуј се, зашто на Тебе се надева душата моја, и во сенката на крилјата Твои ќе ја положам надежта моја додека не минат беззаконијата.

²Ќе повикам кон Бога Севишниот, кон Бога, Кој ми прави добро.

³Он ќе прати од небото и ќе ме спаси; ќе ги посрами оние, кои ме презираат. Ќе ја испрати Бог Својата милост и Својата вистина.

⁴И нека ја избави душата моја од лавови; лежам смутен меѓу синовите човечки; та нивни заби се копја и стрели, а јазикот им е остар меч.

⁵Возвиси се на небесата, Боже, и по целата земја нека биде Твојата слава!

⁶Тие подготвија стапица за нозете мои; и се обидоа да ја измамат душата моја: ископаа пред мене јама, но сами паднаа во неа.

⁷Подготвено е срцето мое, Боже, спремно е срцето мое, ќе пеам и ќе свирам.

⁸Разбуди се, славо моја, разбуди се псалтиру и гусле! Јас ќе станам рано.

⁹Ќе Те славам, Господи, меѓу народите, ќе Те воспеам меѓу племињата,

¹⁰зашто Твојата милост се возвеличи до небесата, и дури до облаците — Твојата вистина.

¹¹Вознеси се, Боже на небесата и по целата земја нека биде Твојата слава!