Read Свето Писмо (Гаврилова) 1990 Псалми 64 Bible Online

Псалми 64 - Свето Писмо (Гаврилова) 1990 bible

Псалми 64

¹Тебе, Боже, Ти припаѓа похвалата на Сион, и Тебе ќе Ти се исполни заветот во Ерусалим.

²Услиши ја молитвата моја; кон Тебе ќе прибегне секој човек.

³Од зборовите на беззакониците, кои надвладуваат над нас и од нашите гревови, очисти нѐ.

⁴Блажен е оној, кого Ти си го избрал и примил; он ќе живее во Твоите дворови; ќе се исполни со добрини од Твојот дом; а Твојот дом е свет, и чудесен е во праведноста.

⁵Чуј нѐ, Боже, Спасителе наш, надеж на сите земни краишта и на оние што се далку преку морето.

⁶Ти, Кој горите си ги поставил со силата Своја и со моќ си се препашал,

⁷Ти Кој ја раздвижуваш морската длабочина и шумот што го прават брановите. Ќе поштукнат народите.

⁸И ќе се уплашат сите оние што живеат во краиштата од чудесата Твои: ќе создадеш радост каде што утрото се раѓа и вечерта заоѓа.

⁹Ти ја посетуваш земјата, ја напојуваш, ја збогатуваш: потокот Божји е полн со вода; си им приготвил храна, бидејќи тука си ја устроил.

¹⁰Ги напојуваш браздите нејзини, и ги умножуваш житата нејзини и со дождовни капки ја благословуваш да раѓа плодови;

¹¹ја овенчуваш годината со Твојата добрина и полињата Твои полни се со згоен добиток.

¹²Се појавуваат пасишта по пустињите и ритчињата се исполнуваат со радост;

¹³Трлата се умножуваат со стада, а долините се китат со плодови: воскликнуваат и пеат.