Read Свето Писмо (Гаврилова) 1990 Псалми 88 Bible Online

Псалми 88 - Свето Писмо (Гаврилова) 1990 bible

Псалми 88

¹Милоста, Твоја, Господи, вечно ќе ја воспевам, од род во род ќе ја разгласувам со устата своја Твојата вистина.

²Зашто рече: милоста е за вечност установена, а на небото Ти ја утврди Твојата вистина.

³»Јас поставив завет со Моите избраници, му се заколнав на Мојот слуга Давида:

⁴за вечност ќе го одржувам твоето потомство, од род во род и ќе го утврдувам твојот престол.«

⁵И небото ќе ги прославува. Господи, Твоите чудесни дела и Твојата вистина во собранијата на светиите.

⁶Зашто, кој на облаците ќе се споредува со Господа и кој од синовите Божји ќе се изедначи со Господа?

⁷Во соборот на светиите Бога Го прославуваат; велик е и страшен за сите што Го окружуваат.

⁸Господи, Боже на силите, кој е еднаков со Тебе. Силен Си Ти, Господи, и вистината Твоја е околу Тебе.

⁹Ти управуваш со силата морска и силните бранови негови, Ти ги скротуваш.

¹⁰Ти го поразуваш гордиот како ранет, со Твојата крепка рака ги распрснуваш непријателите Свои.

¹¹Твои се небесата и твоја е земјата; вселената и она, што ја исполнува, Ти си ја основал.

¹²Север и југ Ти си ги создал; Тавор и Ермон за Твоето име се радуваат.

¹³Силна е Твојата мишка, црвста е раката Твоја, високо е издигната десницата Твоја!

¹⁴Правдата и судот се основа на Твојот престол; милоста и вистината одат пред Твоето лице.

¹⁵Блажени се луѓето, што го познаваат трубниот глас. Тие одат во светлината на Твоето лице, Господи;

¹⁶за Твоето име се радуваат цел ден и со Твојата правда се возвишуваат,

¹⁷зашто Ти си похвала на силите нивни и со Твоето благоволение се издига нашиот рог,

¹⁸бидејќи нашата заштита доаѓа од Господа и од светецот Израилев, нашиот Цар.

¹⁹Некогаш Ти си им зборувал на Твоите синови во видение и си рекол: »Јас му дадов помош на силниот, го издигнав избраникот меѓу Мојот народ.

²⁰Го најдов Мојот слуга Давида; со својот свет елеј го помазав.

²¹Раката Моја ќе го застапува, и мишката моја ќе го закрепнува.

²²Непријателот не ќе може ништо да му направи, и синот на беззаконието нема да го измачува.

²³Ќе ги уништам пред него непријателите негови и ќе ги победам оние, што го мразат.

²⁴И Мојата вистина и Мојата милост се со него, и преку Моето име ќе се возвишува неговиот рог.

²⁵И ќе ја положам над морето раката негова, и над реките — десницата негова.

²⁶Тој ќе ме призива: Ти си мој Отец, мој Бог и крепост на моето спасение.

²⁷И Јас ќе го направам првороден син, повисоко од земните цареви,

²⁸засекогаш ќе му ја зачувам Мојата милост и Мојот завет со него да биде верен.

²⁹И ќе го продолжам за секогаш неговото потомство и неговиот престол, — колку деновите на небото.

³⁰Ако синовите негови го остават Мојот закон и не одат по Моите заповеди;

³¹ако ги нарушат Моите наредби и не ги запазуваат Моите повелби,

³²тогаш ќе ги посетам со жезалот поради нивното беззаконие, и со рани — заради неправдите нивни;

³³но милоста Своја нема да ја одземам од него и вистината нема да ја превртам.

³⁴Нема да го нарушам Мојот завет и нема да го изменам она, што излегло од устата Моја.

³⁵Еднаш се заколнав во светоста Своја: ќе ги излажам ли Давида?

³⁶Неговото потомство вечно ќе пребива, неговиот престол ќе биде како сонце пред Мене,

³⁷засекогаш ќе стои како месечината; и верен сведок е на небото.«

³⁸Но Ти го отфрли и го презре, негодуваше на Твојот помазаник;

³⁹го разруши заветот со Твојот слуга, го оскверни светилиштето негово на земјата;

⁴⁰ги разруши сите негови огради, ги претвори во урнатини неговите крепости.

⁴¹Го ограбуваат сите што поминуваат по патот; тој стана за потсмев на своите соседи.

⁴²Ти ја возвиши десницата на неговите противници, ги зарадува сите непријатели негови;

⁴³Ти му откажа помош на мечот негов и во борбата не го поткрепи;

⁴⁴ја одзеде од него чистотата и го урна на земја престолот негов;

⁴⁵ги скрати деновите на времето негово и го покри со срам.

⁴⁶До кога, Господи, ќе се одрваќа непрестајно? Го кога ќе гори гневот Твој како оган.

⁴⁷Спомни си, колкав е векот мој: за каква суета си ги создал сите синови човечки.

⁴⁸Кој од луѓето ќе живее, а смрт да не види, и да ја спаси душата од пеколот?

⁴⁹Каде се Твоите поранешни милости, Господи, за кои му се заколна на Давида во Твојата вистина.

⁵⁰Сети се, Господи, на подбивите од слугите Твои што ги носам во пазувите свои од многуте народи;

⁵¹на подбивите од Твоите непријатели, Господи, со кои ја валкаат трагата на Твојот помазаник.

⁵²Нека е благословен Господ во сите векови! Амин, Амин!