Read Свето Писмо (Гаврилова) 1990 Мудри Соломонови Изреки 25 Bible Online

Мудри Соломонови Изреки 25 - Свето Писмо (Гаврилова) 1990 bible

Мудри Соломонови Изреки 25

¹И ова се мудри изреки Соломонови, што ги собраа луѓето на јудејскиот цар Езекија.

²Слава за Бога е да ја вообликува секога работа со тајна, а слава за царевите е да ги истражуваат работите.

³Како небото во висините и земјата во длабочините, така и срцето на царевите е неиспитливо.

⁴Оддели ја смесата од среброто, и истата ќе биде работа на златарот;

⁵оддалечи го неправедниот од царот, и престолот негов ќе се зацврсти со правда.

⁶Не се кревај на големо пред лицето на царот и не седнувај на местото на големците;

⁷зашто подобро е кога ќе ти кажат: »дојде тука погоре«, отколку кога ќе те понизат пред кнезот, кога го виделе очите твои.

⁸Она што го виделе твоите очи не брзај да го изнесеш во обвинение, зашто, што ќе правиш на крајот, кога твојот противник ќе те посрами?

⁹Суди се со противникот, но туѓи тајни не откривај,

¹⁰за да не те прекори оној, што ќе го чуе тоа, и тогаш нечесноста твоја нема да избега од тебе. Љубовта и дружбата ослободуваат: запази ги за себеси, за да не станеш достоен за навредување; запази си ги патиштата свои добро уредени.

¹¹Умесно кажаниот збор е како златно јаболко во сребрена кошничка.

¹²Мудриот разобличувач за внимателно уво е како златна обетка и украс од чисто злато.

¹³Како ладен снег во време на жетва, така е верен оној пратеник, што се испраќа: тој му донесува утеха за душата на својот господар.

¹⁴Како облаците и ветровите без дожд, таков е човекот, кој се фали со лажливи подароци.

¹⁵Во долготрпеливота е успехот на царевите, а мек јазик коски крши.

¹⁶Ако најдеш мед, само јади, колку што ти треба за да не се прејадеш и да не го повратиш.

¹⁷Не оди често во куќата на пријателот свој, за да не му додеваш и да не те намрази.

¹⁸Она што е чеканот, мечот и острата стрела, таков е човекот, кој што сведочи лажно против ближниот свој.

¹⁹Она што е скршен заб и крива нога, таква е надежта на безнадежниот во злочест ден.

²⁰Она што е оној, кој соблекува облека во студен ден, она што е оцет на рана, таков е оној, кој песни пее на натажено срце. Како што молец ја повредува облеката и црвот — дрвото, така жалоста го повредува човековото срце.

²¹Ако непријателот твој е гладен, нахрани го со леб; и ако е жеден, напој го со вода;

²²зашто, правејќи го тоа, ти натрупуваш жар врз главата негова, и Господ ќе ти воздаде.

²³Северниот ветер дожд донесува, а таен јазик — незадоволни лица.

²⁴Подобро да живееш во агол на покривот, отколку со жена кавгаџика во широка куќа.

²⁵Она што е студената вода за измачената душа од жед, тоа е добрата вест од далечна страна.

²⁶Она што е заматен извор и растурен кладенец, тоа е праведниот кој паѓа пред нечесниот.

²⁷Како што не е добро да се јаде многу мед, така не е добро и да лакомиш за слава што не е слава.

²⁸Она што е разрушен град, без ѕидови, таков е човекот, кој не владее со духот свој.