Read Свето Писмо (Гаврилова) 1990 Мудри Соломонови Изреки 3 Bible Online

Мудри Соломонови Изреки 3 - Свето Писмо (Гаврилова) 1990 bible

Мудри Соломонови Изреки 3

¹Синко, не ја заборавај поуката Моја и срцето твое да ги чува заповедите Мои;

²зашто тие ќе ти придадат долги дни, години на живот и мир.

³Милостињата и верата да не бидат скудни во тебе: обеси ги на вратот свој, напиши ги на плочите на срцето свое, —

⁴па ќе најдеш милост и благоволение пред очите на Бога и на луѓето.

⁵Надевај се на Господа од сѐ срце и не се потпирај врз твојот разум.

⁶По сите свои патишта размислувај за Него, и Он ќе ти ги покаже твоите патеки.

⁷Не се сметај за мудрец; бој се од Господа и бегај од злото:

⁸тоа ќе биде здравје за твоето тело и лек за твоите коски.

⁹Давај му принос на Господа од имотот твој и од привините на плодовите од твоите придобивки,

¹⁰та твоите житници да се исполнат до врвот, твоите бочви да се прелеваат од вино.

¹¹Не занемарувај ја, синко, казната од Господа, и да не ти е тешко од Неговото изобличување;

¹²зашто кого Господ го сака, него и го кара, како и таткото синот свој што го љуби.

¹³Блажен е човекот, кој се здобил со мудрост, и човек, што спечалил разум;

¹⁴подобро е да ја добиеме неа, отколку ризници со сребро и злато;

¹⁵таа е поскапа и од скапоцени камења; ни едно зло не може да ѝ се спротивстави; таа им е добро позната на сите, што се приближуваат кон неа, ништо, па и сѐ што ти е мило, не може да се спореди со неа.

¹⁶Во десницата нејзина е долгоденствието, а во левицата ѝ е — богатството и честа; од устата ѝ излегува правда; закон и милост носи на јазикот свој;

¹⁷патиштата нејзини се пријатни патишта, и сите патеки нејзини се — спокојни.

¹⁸таа е дрво на животот за оние, што ја придобиваат, и блажени се, кои ја запазуваат.

¹⁹Господ со премудроста ја основа земјата, со разум ги утврди небесата;

²⁰преку Неговата премудрост се отворија бездните, и облаците оросија со роса.

²¹Синко, не ги испуштај од предвид овие, работи; запази ја мудроста и разумот;

²²тие ќе бидат живот за душата твоја и украс на вратот твој; ќе бидат изцеление за твоето тело и лек за твоите коски.

²³Тогаш ќе одиш без опасност по патот свој, и ногата твоја нема да се сопне.

²⁴Коге ќе легнеш да спиеш, нема да се плашиш, и кога ќе заспиеш, сонот ќе ти биде пријатен.

²⁵Нема да се исплашиш од ненадеен страв, ниту од напад, кој доаѓа од безбожниците,

²⁶бидејќи Господ ќе биде на сите твои патишта и ќе ја запази ногата твоја од препнување.

²⁷Не откажувај да му направиш добро на оној, кој има потреба, кога раката твоја има сила да му помогне.

²⁸Не му вели на пријателот свој: »Оди си и дојди пак; утре ќе ти дадам« кога си во состојба да му помогнеш, зашто не знаеш што ќе роди утрешниот ден.

²⁹Не крои зло против ближниот свој, кој е придојден и кој со доверба живее при тебе.

³⁰Не се карај со човек без причина, кога не ти направил никакво зло.

³¹не завидувај му на човек што постапува насилно, и не избирај ни — еден од патиштата негови,

³²зашто на Господа му е одвратен безбожникот, а близок е со праведникот.

³³Проклетството Господово е врз домот на нечесниот, а живеалиштето на праведникот Бог го благословува.

³⁴Над оние што се подигруваат, Он се потсмева, а на смирените им дава благодат.

³⁵Мудрите ќе наследат слава, а безумните — срам.