Read Свето Писмо (Гаврилова) 1990 Мудри Соломонови Изреки 4 Bible Online

Мудри Соломонови Изреки 4 - Свето Писмо (Гаврилова) 1990 bible

Мудри Соломонови Изреки 4

¹Слушајте ја, деца, татковата поука и внимавајте, та да се научите да ја разбирате,

²зашто добар дар ви дарувам; не оставајте ја мојата заповед.

³Зашто и јас бев син послушен на татка ми, и омилен на мајка ми;

⁴и татко ми ме поучуваше и ми велеше: »Зборовите мои задржи ги во срцето твое; пази ги моите заповеди и не заборавај ги!

⁵Здобивај се со мудрост, придобивај разум; не заборавај го тоа и не се отстранувај од зборовите на устата моја.

⁶Не ја оставај, — и таа ќе те пази, сакај ја, — и таа ќе те чува.

⁷Главно е мудроста: придобивај мудрост и за сиот свој имот придобивај разумност.

⁸Високо цени ја, и таа ќе те воздигне; таа ќе те прослави, ако ја прегрнеш,

⁹ќе положи на главата твоја благодатен венец, со венец на сладост ќе те закрили.

¹⁰Слушај, синко, и прими ги зборовите мои, — и ќе ти се умножат годините на животот.

¹¹Ти го покажувам патот на мудроста, те водам по прави патеки.

¹²Ако одиш, нозете твои нема да се сопнат, и ако потрчаш, нема да се измориш.

¹³Држи се здраво за поуката, не ја оставај; пази ја, бидејќи таа е твојот живот.

¹⁴Не оди на пат безбожнички и не оди по патот на лоши луѓе;

¹⁵остави го, не оди по него, отстрани се од него и заобиколи го;

¹⁶зашто тие не заспиваат, ако не направат зло; и сон не ги фаќа, ако не доведат некого до пад;

¹⁷оти тие јадат леб од беззаконие и се опиваат со вино од грабеж.

¹⁸Патеката на праведните е како болскава светлина, која свети сѐ повеќе и повеќе дури не настане ден.

¹⁹А патот на беззакониците е како темнина; тие не знаат, од што ќе се сопнат.

²⁰Синко, внимавај на зборовите мои и приближи го увото кон поуките мои;

²¹да не остапуваат тие од твоите очи; чувај ги внатре во срцето свои:

²²зашто тие се живот за оние што ги наоѓаат, и здравје за целото тело нивно.

²³Од сѐ, што е за пазење, најмногу чувај го срцето свео, зашто од него се изворите на животот.

²⁴Отфрли ја од себеси лажливата уста, а лукавството на јазикот од себеси оддалечи го.

²⁵Очите твои нека гледаат право, и клепките твои да бидат управени кон праведното.

²⁶Провери ја патеката со нозете свои, и сите патишта твои нека бидат прави.

²⁷Не скршнувај ни десно, ни лево; оддалечи ја ногата од злото,

²⁸зашто десните патишта Господ ги надгледува, а левите се расипани.

²⁹Он ќе ги направи твоите патишта прави, и твоето одење ќе го уреди во мир.«