Read Свето Писмо (Гаврилова) 1990 Проповедник 7 Bible Online

Проповедник 7 - Свето Писмо (Гаврилова) 1990 bible

Проповедник 7

¹Подобро е добар глас, отколку скапоцен елеј, и смртниот ден — од родениот ден.

²Подобро е да одиш во куќа каде што плачат по умрен, отколку да отидеш во куќа, каде што се гоштева, зашто таков е крајот на секој човек, и животот ќе го приложи тоа кон срцето свое.

³Тагата е подобра од смеата; зашто, кога е лицето нажалено, срцето станува подобро.

⁴на умните срцето им е во куќата, каде што плачат, а на безумните во куќа, каде што се веселат.

⁵Подобро е да слушаш прекор од мудар, отколку да слушаш песни на безумен;

⁶зашто смеата на безумните е како прскање на трње под котел. И тоа е суета!

⁷Клеветењето го избезумува мудриот, а подароците го расипуваат срцето.

⁸Крајот на една работа е подобар од почетокот нејзин; трпеливиот е подобар од горделивиот.

⁹Не станувај со духот свој брз на гнев, зашто гневот почива во пазувите на безумните.

¹⁰Не вели: »Зошто поранешните дни биле подобри од сегашните?«, оти не е мудро да прашуваш за тоа.

¹¹Добра е мудроста, како и наследството, особено за оние, што го гледаат сонцето,

¹²зашто под нејзината сенка е исто, како под сенката на сребро; но предимството на знаење е тоа, што мудроста му дава живот на оној, што ја има.

¹³Погледај ги Божјите дела: кој може да го исправи она, што Бог го направил криво?

¹⁴Во добро време ползувај се со доброто, а во зли дни размислувај: едното и другото го направил Бог, за да не може човекот да каже ништо против Него.

¹⁵Се нагледав на сѐ во моите суетни дни: праведниот загинува во својата праведност; нечесниот живее долго во нечесноста своја.

¹⁶не бивај строг и немој да се покажуваш за многу умен, за да не се избезумиш.

¹⁷Не се предавај на грев и не станувај жесток; зошто да умреш предвреме?

¹⁸Добро е, ако се држиш за едното но и друго да не испушташ од раката своја; зашто, кој се бои од Бога, ќе се избави од сето тоа.

¹⁹Мудроста го крепи мудриот повеќе од десет кнезови што се во градот.

²⁰Нема праведник на земјата, кој прави добро и никако да не греши;

²¹затоа не обрнувај внимание на секој збор, што се кажува, за да не го чуеш и слугата свој, кога те навредува;

²²зашто срцето твое знае многу работи, кога и ти самиот си навредувал други.

²³Сето тоа го испитав со мудрост; јас реков: »Ќе бидам мудар«, но мудроста е далеку од мене.

²⁴А она што е така далеку и многу длабоко: кој ќе го испита?

²⁵Се свртив со срцето свое, за да ги дознаам, изучам и истражам мудроста и разумот, и да го познаам безумието на нечестивиот, и жестокоста и лукавството,

²⁶и најдов, дека погорчливо до смртта е жената, зашто таа е мрежа, срцето нејзино — стапица, рацете нејзини — окови; добриот пред Бога ќе се спаси од неа, а грешникот ќе биде уловен од неа.

²⁷»Ете, тоа најдов јас — рече Проповедникот — испитувајќи едно по друго.«

²⁸Што уште бараше душата моја, и не го најде? — Маж најдов еден на илјада, но жена меѓу сите нив не најдов.

²⁹Само, ете, тоа го најдов, дека Бог го направил човекот добар, но луѓето се впуштаат во многу мудрувања.