Read Свето Писмо (Гаврилова) 1990 Песна над песните 2 Bible Online

Песна над песните 2 - Свето Писмо (Гаврилова) 1990 bible

Песна над песните 2

¹Јас сум саронски нарцис, долински крин!

²Она што е кринот меѓу трњето, тоа е мојата возљубена меѓу момите.

³Она што е јаболкницата меѓу шумските дрвја, тоа е мојот возљубен меѓу момците. Посакав сенка нејзина, и седнав; плодовите нејзини се слатки за грлото мое.

⁴Тој ме воведе во куќата за гозба, и знамето негово над мене беше љубов.

⁵Поткрепете ме со сочни гроздови, освежете ме со јаболка, зашто сум болна од љубов.

⁶Левата рака негова ми е под главата, а со десната ме прегрнува.

⁷Ве заколнувам ќерки ерусалимски, во срните и во полските кошути: немојте да ја разбудувате и да ја вознемирувате возљубената, додека сама не посака.

⁸Гласот на мојот возљубен, еве, го: доаѓа, скока преку фиданките по горите, прескокнува преку ридовите.

⁹Мојот возљубен прилега на срна, на млад елен. Ете, стои зад ѕидот наш, погледнува низ прозорецот, ѕирка низ решетката.

¹⁰Мојот возљубен се огаси и ми рече: »Стани, мила моја, убавице моја, дојди!

¹¹Еве, зимата веќе мина, дождот го снема, престана веќе,

¹²цвеќиња се појавија по земјата; настана време за кроење лози, и гласот на гугутката се слуша во земјата наша;

¹³смоквите ги отворија пупките свои, и расцутените лози пријатно мирисаат. Стани, мила моја, убавице моја, и дојди!

¹⁴Гулабице моја во карпест пролом, под камено засолниште, покажи ми го лицето свое, дај ми да го чујам гласот твој, зашто гласот ти е ѕвонлив, и лицето ти е прекрасно.

¹⁵Фатете ни ги лисиците, лисичињата, оти тие ги пустошат лозјата, а лозјата ни цутат.«

¹⁶Мојот возљубен е мој, јас, пак, сум — негова; тој го пасе стадото меѓу кринови.

¹⁷Додека денот не измине и сенките ги снема, врати се, мил мој, и биди како срна, како млад елен, по горите што не разделуваат.