Read Свето Писмо (Гаврилова) 1990 Мудрост Соломонова 5 Bible Online

Мудрост Соломонова 5 - Свето Писмо (Гаврилова) 1990 bible

Мудрост Соломонова 5

¹Праведникот ќе застане со голема смелост пред лицето на оние што го навредувале и ги презирале неговите подвизи;

²а тие, откако ќе видат, ќе се збунат во голем страв и ќе се вчудовидат од неговото ненадејно спасение.

³И, раскајувајќи се и воздивнувајќи од притеснувањето на својот дух, ќе мислат во себеси: тоа е оној истиот, кој некогаш служеше ѕа подбив и кој ни беше предмет на потсмев.

⁴Ние, безумните, неговиот живот го сметавме за лудост, а смртта негова — нечесна!

⁵А како ли е приброен кон синовите Божји и како добил дел меѓу светите?

⁶И така, ние, навистина, се одвоивме од патот на вистината, светлината на правдата не ни светеше, а и сонцето не нѐ огреа.

⁷Ние се исполнивме со беззаконија и лоши дела, а патот на Господа не го познавме.

⁸Каква полза ни донесе гордоста? Што ни даде богатството со празни зборови?

⁹Сето тоа премина како сенка, како краткотраен глас.

¹⁰Како кога помине кораб низ разбранувана вода, ни трага нема од него; не се познава каде поминал, нити има патеки негови во брановите;

¹¹или како птица што во воздух лета и не остава зад себе белег од својот пат, но лесниот воздух, удиран од крилјата и сечен од брзото движење, проникнува со движењето на своите крилја, потоа не останува никаква трага од нејзиниот лет;

¹²или како стрела пуштена кон целта, разделениот воздух веднаш се собира; не се познава патеката, по која поминала;

¹³така и ние се родивме и умревме, и никаков знак на добродетел не можевме да покажеме, а се истоштивме во наш Ето беззаконие.

¹⁴Зашто надежта на безбожникот исчезнува како прав носен од ветрот, како ситен шу Шлек што го разнесува бура, исчезнува како дим на ветар и изминува како споменот на еднодневен гостин.

¹⁵А праведниците живеат довека; нивната награда е во Господа, за нив се грижи Севишниот.

¹⁶Затоа тие ќе го добијат царството на славата и венецот на убавината од раката Господова; Он ќе ги закрили со Својата десница и со Својата мишка ќе ги заштити.

¹⁷Он ќе ја земе Својата ревност и како силно оружје, ќе ги вооружи сите созданија за одмазда против непријателите.

¹⁸Како оклоп ќе ја облече правдата, а како шлем ќе го стави — нелицемерниот суд;

¹⁹светоста ќе ја земе како штит непобедив;

²⁰гневот Свој строг ќе го изостри како меч, и сиот свет ќе појде со Него во бој против безумните.

²¹Тогаш ќе полетаат добро вперените стрели, и од облаците, како од силно затегнат лак, ќе ја погодуваат целта;

²²и како од бојна направа за фрлање камења — ќе се исипе град; морската вода ќе беснее врз нив и реките без милост ќе ги издават.

²³Духот на силата ќе стане против нив и како виор ќе ги разнесе.

²⁴Така беззаконието ќе ја опустоши целата земја и лошите дела ќе го превртат престолот на силните.