Read Свето Писмо (Гаврилова) 1990 Мудрост Соломонова 7 Bible Online

Мудрост Соломонова 7 - Свето Писмо (Гаврилова) 1990 bible

Мудрост Соломонова 7

¹И јас сум смртен човек, како и сите други, потомок сум на првото создание, направено од земја.

²И јас бев обликуван во тело во мајчината утроба во тек на десет месеци, стегнат во крв од семето на маж и од наслада, соединета со сон.

³И јас, кога се родив, дишнав воздух и паднав на оваа земја, првиот глас го пуштив со плач, како и сите;

⁴бев одгледан во пелени и со грижи.

⁵зашто ниеден цар не се родил поинаку;

⁶за сите има само еден влез во животот, а еднаков е и излезот.

⁷Затоа се молев — да ми биде подарен разум, викав — и врз мене влезе духот на мудроста.

⁸Мудроста ја сакав повеќе од скиптри и престоли; а богатството го сметав за ништо пред неа;

⁹скапоцен камен е неспоредлив со неа, зашто пред неа сето злато е како ништожен песок, а среброто е кал — во споредба со неа.

¹⁰Ја засакав повеќе од здравје и од убавина и во изборот повеќе ја засакав од светлината, зашто нејзиниот сјај никогаш не угаснува.

¹¹И заедно со неа дојдоа при мене сите добра и големо богатство преку нејзините раце;

¹²јас им се радував на сите тие добра, зашто мудроста ме раководеше, но не знаев дека е таа нивна создателка.

¹³Без лукавство се нау; ив и без завист ја предавам; богатството нејзино не го кријам.

¹⁴Таа е неисцрпно сокровиште за луѓето; ползувајќи се од неа, тие влегуваат во близина со Бога преку даровите на учењето.

¹⁵Затоа нека ми даде Бог да говорам како што разбирам и да мислам достојно ѕа она што ми е дарувано, зашто Он е водачот на мудроста и управува со мудреците.

¹⁶Во Неговата рака сме и ние и нашите зборови, сето наше разбирање и вештината во работата.

¹⁷Он Самиот ви дава вистинско познавање за она што постои, за да го познаеме строежот на светот и дејството на стихиите.

¹⁸почетокот, крајот и средината на времињата, повратните смени и промената на времињата,

¹⁹годишните кругови и положбата на ѕвездите.

²⁰Природата на животните и својствата на ѕверовите, стремежот на ветровите и на човечките мисли, одликите на растенијата и лековитоста на корените.

²¹Познав сѐ што е скриено и јавно, зашто ме научи мудроста, уметничката на сѐ.

²²Таа е дух разумен, свет, еднороден, многустран, тенок, подвижен, светол, чист, јасен, неопасен, благороден, брз, незадржлив.

²³добродетелен, човекољубив, тврд, непоколеблив, спокоен, безгрижен, кој гледа сѐ и проникнува во сите умни, чисти и најтенки духови.

²⁴Зашто мудроста е поподвижна од секое движење и, поради својата чистота, поминува низ сѐ и во сѐ проникнува.

²⁵Таа е здив на Божјата сила и чист одлив од славата на Седржателот: затоа ништо осквернето нема да влезе во неа.

²⁶Таа е одраз на вечната светлина, огледало чисто на Божјото дејство, слика на Божјата добрина.

²⁷Една е, а може сѐ, останувајќи во себеси, сѐ обновува и, минувајќи од род во род во светите души, таа ги подготвува Божјите пријатели и пророци;

²⁸зашто Бог не го љуби никого, освен оној што се дружи со мудроста.

²⁹Поубава е од сонцето и многу ѕвезди надминува; споредена со светлината, таа е погоре од неа;

³⁰зашто светлината со ноќта се сменува, а злобата нема сила над мудроста.