Read Свето Писмо (Гаврилова) 1990 Мудрост Соломонова 8 Bible Online

Мудрост Соломонова 8 - Свето Писмо (Гаврилова) 1990 bible

Мудрост Соломонова 8

¹Таа брзо се пренесува од едниот крај на светот до другиот, сѐ уредува за полза.

²Ја засакав и од младоста ја побарав, посакав да ми биде невеста, се вљубив во убавината нејзина.

³Благородството свое го издигнува со тоа што живее заедно со Бога; неа ја засакал Владетелот на сите;

⁴посветена е во тајните на Божјиот ум, ги избира Божјите дела.

⁵Ако богатството е многу сакана придобивка во овој живот, тогаш што е побогато од мудроста, која соѕдава сѐ?

⁶Ако благоразумноста прави многу, тогаш кој е подобар уметник од неа?

⁷Ако некој сака праведност, добродетелите се нејзини плодови; таа поучува на умереност и разумност, на справедливост и храброст, од кои за луѓето нема ништо покорисно во животот.

⁸Ако некој копнее по голема опитност мудроста одамна го знае минатото и ја предвидува иднината, ја знае длабоката смисла на зборовите и значењето на гатанките, однапред ги знае знаците и чудата и последиците од годините и времињата.

⁹Затоа одлучив да си ја земам за другарка во животот, знаејќи дека ќе ми биде советница за добро и утешителка во грижите и жалостите.

¹⁰Преку неа ќе имам слава во народот и чест пред старците, иако сум млад.

¹¹На судот остроумен ќе се покажам, ќе се вчудовидуваат големците — кога ќе застанам пред нив.

¹²Кога молчам — ќе чекаат, кога ќе почнам да говорам — ќе внимаваат, а кога ќе продолжам — раката на устата своја ќе ја стават.

¹³Со неа бесмртност ќе придобијам, вечен спомен ќе оставам за оние што ќе дојдат по мене.

¹⁴Ќе владеам со народи, племиња ќе се покоруваат.

¹⁵Ако се уплашат од мене тирани страшни кога ќе чујат за мене; со народот мој добар ќе бидам и храбар во војна.

¹⁶Кога дома ќе се вратам, спокој покрај неа ќе најдам, во другарувањето со неа нема грубости и нема болка во животот со неа, а само радост и веселба.

¹⁷И, откако така за сѐ во себеси размислив и во срцето свое обмислив, дека бесмртноста е во роднинство со мудроста,

¹⁸а во дружба со неа — вистинска наслада, во трудовите на нејзините раце — нејзино неисцрпно богатство; во разговорот со неа — разум, а прифаќајќи ги зборовите нејзини — слава; тогаш појдов и барав како да ја придобијам.

¹⁹Бев даровит младич и бев се здобил со добра душа.

²⁰па, бидејќи добар влегов во чисто тело.

²¹И откако сфатив, дека мудроста не можам да ја придобијам, ако Бог не ми ја подари и дека разумноста требаше да знае чиј е тој дар, — јас пристапив кон Господа и Му се помолив и од сѐ срце Му реков;