Read Свето Писмо (Гаврилова) 1990 Мудрост Сирахова 1 Bible Online

Мудрост Сирахова 1 - Свето Писмо (Гаврилова) 1990 bible

Мудрост Сирахова 1

¹Мудроста и праведноста. Секоја премудрост е од Господа и со Него останува таа засекогаш.

²Кој ќе ги изброи морскиот песок, дождовните капки и деновите на вечноста?

³Кој ќе ги испита височината на небото и ширината на земјата, бездната и премудроста?

⁴Најнапред од сѐ е создадена мудроста, а и разбирањето на мудроста е од вечноста.

⁵Изворот на премудроста е Словото на Севишниот Бог, а одот нејзин се вечните заповеди.

⁶На кого му е откриен коренот на премудроста? Кој го знае нејзиното остварување?

⁷Само еден е премудар и многу страшен — Господ, Кој седи на Својот престол.

⁸Тој ја создал и ја видел, ја измерил,

⁹и ја излеал врз сите Свои дела,

¹⁰врз секое тело според Својата дарба, а најмногу ги дарува оние што Го љубат.

¹¹Стравот Господов е слава и чест, веселба и венец на радоста.

¹²Стравот Господен го радува срцето, му дава веселба, радост и долг живот.

¹³На оној, кој има страв од Господа, добро ќе му биде на крајот, благословен ќе биде во денот на својата смрт; стравот Господен е дар од Господа, кој води по патеките на љубовта.

¹⁴Љубовта спрема Господа е славна премудрост; по својата промисла, Тој им ја дава на оние што ги милува.

¹⁵Почеток на мудроста е стравот Божји. Таа е создадена кај верните уште во утробата на нивната мајка; таа се утврдила меѓу луѓето на вечни основи, на нивните потомци таа ќе им биде дадена.

¹⁶Стравот Господен е полнота на мудроста, таа ги опива луѓето со своите плодови.

¹⁷Нивниот дом го исполнува со сѐ што сакаат и сите нивни житници — со своите плодови.

¹⁸На мудроста венецот е стравот Господен; тој дарува мир и крепко здравје; и едното и другото од Бога се дарови, Кој ја зголемува радоста на оние што Го љубат.

¹⁹Он ја виде и ја измери, Он излива знаење и разум; ја издига славата на оние што ја имаа.

²⁰Коренот на мудроста е — да имаш страв од Господен; долг животот на нејзините гранки.

²¹Стравот Господен ги отстранува гревовите; а кој нема страв — не може да се оправда.

²²Несправедлив гнев не може да се оправда; тежината на гневот — паѓање е за човекот.

²³Трпеливиот човек претрпува докрај, а потоа — наградата негова е радост.

²⁴Долго ги сокрива своите зборови, а устите на верните ќе говорат за неговата разумност.

²⁵Во сокровиштата на мудроста се тајните на разумот, а грешникот не го сака стравот Господов.

²⁶Ако копнееш по мудроста, исполнувај ги заповедите, и Господ ќе ти ја даде,

²⁷бидејќи стравот пред Господа е мудрост и знаење; а верата и кротоста Му се угодни на Бога.

²⁸Не биди недоверлив спрема стравот Господен; со срце раздвоено не пристапувај кон Него.

²⁹Не биди лицемерен пред другите; и внимавај на својата уста.

³⁰Не гордеј се, за да не паднеш и да не бидеш осрамотен; Господ ќе ги открие твоите тајни и ќе те понизи пред сите — затоа што не си пристапил искрено пред стравот Господен и што срцето твое е полно со лукавства.