Read Свето Писмо (Гаврилова) 1990 Мудрост Сирахова 14 Bible Online

Мудрост Сирахова 14 - Свето Писмо (Гаврилова) 1990 bible

Мудрост Сирахова 14

¹Вистинско блаженство. Блажен е оној што не згрешил со уста и што не почувствувал болка поради грев.

²Блажен е оној што душата негова не го осудува и што надежта не ја загубил.

³На скржавиот не му прилега богатство; што ќе му е имот на завидливец?

⁴Кој од себе одзема, за други собира; со богатството негово друг ќе се насладува.

⁵Кој за себе е лош, за кого добар ќе биде? Таквиот не ќе му се радува на имотот свој.

⁶Нема полош од оној, кој за себе добро не сака; тоа му е казна за злобата негова.

⁷Па, ако и добро направи, го прави ненамерно; подоцна своето зло го пројавува.

⁸Лош е кој очи завидливи има; кој поглед свртува и презира луѓе.

⁹Среброљубец не е задоволен од она што го има; неправдата душата му ја суши.

¹⁰Скржавиот и лебот го штеди; неговата трпеза секогаш е скудна.

¹¹Синко, според имотот свој, прави добро на себеси и на Господа жртви достојни принесувај.

¹²Помни дека смртта не задоцнува и дека заветот на пеколот не ти е откриен.

¹³Пред да умреш, на пријателот добро прави му; според твоите сили — што можеш давај му.

¹⁴Не лишувај се од добриот ден; делот од твојата добра желба да не те одмине.

¹⁵Нема ли на други имотот свој да го оставиш, а плодот на твоите усилби — со ждрепка други да го делат?

¹⁶Давај и земај и утешувај ја душата своја.

¹⁷Утеха во пеколот нема да најдеш.

¹⁸Сѐ што е живо како облека остарува; вечна е одредбата дека треба да се умре.

¹⁹Како и зелените лисја на бујно дрво — едни паѓаат, а други растат, така е и со родот од крв и месо: еден умира, а друг се раѓа.

²⁰Секое дело што гние — пропаѓа, и оној што го направил — умира со него.

²¹Блажен е човекот што напредува во мудроста, а со разумот свој на работи свети се учи.

²²Кој во срцето свое размислува за нејзините патишта, тој успева да ги разбере тајните нејзини.

²³Тој како ловец ја гони и заседи поставува на патиштата нејзини.

²⁴Оној што ѕирка низ прозорците нејзини, ќе прислушува и на нејзините врати.

²⁵Тој што е близу до нејзината куќа, клинец забива во нејзиниот ѕид; шаторот свој до неа го поставува, ќе живее во дом на изобилство;

²⁶децата свои ги остава под нејзината закрила и живее под нејзините гранки;

²⁷се засолнува од жегата и живее во славата на мудроста.