Read Свето Писмо (Гаврилова) 1990 Мудрост Сирахова 22 Bible Online

Мудрост Сирахова 22 - Свето Писмо (Гаврилова) 1990 bible

Мудрост Сирахова 22

¹Пријателство и претпазливост. На извалкан камен прилега мрзливиот и секој го презира неговото бесчестие.

²Мрзливиот е сличен на воловска лепешка; секој што ќе ја подигне, раката ја истресува.

³Лошиот син на таткото е срам, а лошата ќерка за понижување се раѓа.

⁴Разумната ќерка лесно ќе се мажи, а бесрамната е жалост на родителот свој.

⁵Нечесната го срамоти и таткото и мажот; обајцата ја презираат.

⁶Несоодветните зборови се како музика во денови на жалост; на мудроста казната и поуката секогаш се навреда.

⁷Да поучуваш неразумен е исто што и скршено грне да лепиш или да будиш длабоко заспан човек.

⁸На глупав да му објаснуваш, исто е што и на задреман човек да му раскажуваш, кој на крајот ќе те праша: »Што беше тоа!?«

⁹Плачи над умрен, зашто светлината за него исчезнала, а плачи и над глупав, зашто разумот го напуштил.

¹⁰Но помалку плачи за умрениот, зашто тој се успокоил; лошиот живот на глупавиот — полош е и од смртта.

¹¹По умрениот жали седум дни, а по неразумниот и безбожниот жали додека се живи.

¹²Со безумник многу не зборувај и кај неразумен не оди;

¹³чувај се од него, за да немаш непријатности и да не се извалкаш од допирот со него.

¹⁴Бегај од него — за да имаш спокој, да не те огорчи со безумието негово.

¹⁵Што е потешко од оловото и како му е името — ако не глупак?

¹⁶Полесно е да носиш песок и сол или парче железо, отколку човек неразумен.

¹⁷Како што цврсто врзаните греди ја пазат куќата при тресење од уривање, така и срцето утврдено врз зрели размислувања — не се плаши од никаков страв.

¹⁸Срцето утврдено на разумно размислување е како украс извајан на ѕид.

¹⁹Потпирка ставена високо не устојува против ветар.

²⁰И плашливото срце, при глупаво размислување, не ќе устои против стравот.

²¹Кој удира око, предизвикува солзи, а кој го удира срцето чувство на болка предизвикува.

²²Кој фрла камен на птици — ќе ги избрка, а кој пријател навредува, пријателство расипува.

²³Ако си извадил и меч против пријателот, не плаши се, измирувањето е можно.

²⁴Ако си отворил уста против пријател, не плаши се, измирувањето е можно.

²⁵Само хулата, гордоста, откривањето тајни и подмолен удар го одвраќаат секој пријател.

²⁶Кај ближниот свој придобивај доверба додека е сиромав, за д се радуваш заедно со него кога ќе стане богат.

²⁷Остани со него кога е во неволја, за да го делиш наследството со него.

²⁸Пред пламенот во печката се јавува пара и дим, а пред крвопролевање се појавува кавга.

²⁹Не се срамувам пријател да бранам, од лицето негово нема да се кријам.

³⁰Ако, пак, ме снајде зло од него, секој што ќе чуе ќе се пази од него.

³¹Кој ќе ми даде стража за устата моја и печат на разумот врз усните мои, та да не паднам поради нив и јазикот мој да не ме погуби.