Read Свето Писмо (Гаврилова) 1990 Мудрост Сирахова 28 Bible Online

Мудрост Сирахова 28 - Свето Писмо (Гаврилова) 1990 bible

Мудрост Сирахова 28

¹Одмазда. Одмаздникот ќе добие одмазда од Господа, Кој не ги заборава неговите гревови.

²Прости му ја навредата на ближниот твој и тогаш, откако се помолиш, гревовите твои простени ќе ти бидат.

³Кога човек човека го мрази, како може од Господа опростување да бара?

⁴За човек сличен на себе, тој милост нема, а се моли гревовите негови простени да му бидат.

⁵Самиот, бидејќи тело полн е со омраза, па кој гревовите ќе му ги прости?

⁶Спомнувај си за крајот твој и престани да мразиш; спомни си за смртта и гниењето, па заповедите извршувај ги.

⁷На заповедите мисли и ближниот не мрази го.

⁸Помни го заветот на Севишниот, и вината на братот твој прости му ја.

⁹Од кавга бегај, така помалку ќе грешиш.

¹⁰Грешникот раздор сее меѓу пријателите; меѓу оние што живеат во мир, недоверба шири.

¹¹Огнот се разгорува во зависност од тоа што е она што гори;

¹²каква е силата на човекот, таков ќе биде и неговиот гнев; гневот се зголемува и според богатството негово.

¹³Жешка рсправија оган распалува, а жестока кавга крв пролева.

¹⁴Дуваш ли искра — таа ќе се рспали, плукнеш ли на неа, таа ќе се угасне; и едното и другото излегуваат од твојата уста.

¹⁵Озборувачот и лажливецот проколнати да се; тие погубиле многумина што живееле во мир.

¹⁶Третиот јазик многумина изгонил, ги гонел од еден народ во друг,

¹⁷уривал градови утврдени, уривал палати на богати;

¹⁸третиот јазик избркал чесни жени, ги лишил од плодовите на нивниот труд.

¹⁹Кој него го слуша, мир нема да има ни спокоен дом.

²⁰Ударот со бич модрици прави, а ударот со јазик, коски крши.

²¹Многумина паднале од остар меч, но повеќе се оние што паднале од јазик.

²²Блазе на оној што од него се заштитил; неговиот бес не го почувствувал, кој во јаремот негов не бил и не бил врзан со неговите вериги.

²³Јаремот негов е железен, а веригите негови — бакарни.

²⁴Страшна е смртта што ја донесува; и пеколот е подобар од неа,

²⁵но нема сила на побожните; нив не ги гори пламенот негов.

²⁶Жртви негови се оние што Го оставиле Господа; во нив ќе се разгори и нема да изгасне; како лав ќе ги нападне и како пантер ќе ги раскине.

²⁷Слушај, со трње загради го имотот твој,

²⁸добро заклучи ги златото и среброто,

²⁹а за зборовите направи си мерка; на устата твоја — врата и клучалка.

³⁰Пази да не се сопнеш од јазикот свој; на оние што демнат — плен да не им бидеш.