Read Свето Писмо (Гаврилова) 1990 Мудрост Сирахова 3 Bible Online

Мудрост Сирахова 3 - Свето Писмо (Гаврилова) 1990 bible

Мудрост Сирахова 3

¹Дожноста спрема родителите. Деца, послушајте ме мене, вашиот татко, и постапувајте така, за да се спасите,

²зашто Господ го издигнал таткото над неговите деца; Тој го утврдил правото на мајката над нејзините синови.

³Кој го почитува татко си — ќе се очисти од своите гревови,

⁴а кој се однесува со почит кон својата мајка — придобива големо богатство.

⁵Кој го почитува својот татко — ќе има радост од своите деца и во денот на неговата молитва ќе биде слушнат.

⁶Кој го почитува татко си, долго ќе живее, а кој Го слуша Господа, ќе ја успокојува својата мајка.

⁷Кој има страв Господен, тој го почитува татко си; на своите родители им служи како на господари.

⁸со дела и со зборови почитувај ги твоите родители, за да бидеш благословен од нив.

⁹Зашто благословот на таткото ги утврдува домовите на децата, а мајчината клетва ги урива до темели.

¹⁰Не барај ја својата слава во срамот на својот татко, зашто срамот на твојот татко не може да биде чест за тебе.

¹¹Славата на човекот доаѓа од честа на неговиот татко, а непристојната мајка е срам за своите деца.

¹²Синко, помогни му на татко ти во неговата старост и не го огорчувај додека е жив.

¹³Ако неговиот ум и ослабнал, биди благ кон него и не го изоставај, кога си во полна сила,

¹⁴зашто не се заборава милоста кон таткото; и покрај сите твои гревови, твојата благосостојба ќе расте.

¹⁵Во деновите на твојата неволја Господ ќе се сети на тебе; како мразот од топлината, така ќе се истопат твоите гревови.

¹⁶Богохулник е оној којшто го остава својот татко, а проколнат од Господа е оној што ја навредува својата мајка.

¹⁷Синко, со кротост врши ги твоите работи, и од богоугоден човек ќе бидеш сакан.

¹⁸Колку си поголем, толку повеќе да се смируваш, за да најдеш милост во Господа.

¹⁹Голем е бројот на издигнатите и славни луѓе, но тајните им се откриваат само на смирените.

²⁰Зашто голема е Божјата сила; Него Го прославуваат смирените.

²¹Не барај го она што е преголемо и претешко за тебе; не истражувај го она што е над твоите сили.

²²Размислувај за она што ти е заповедано; не се занимавај со она што е сокриено од тебе.

²³При многу твои занимања не грижи се за она што ти е непотребно; тебе ти се откриени многу човечки знаења.

²⁴Многумина се воведени во заблуда од нивните претпоставки; лукавите замисли го поколебуваат нивниот ум.

²⁵Кој ги сака опасностите — ќе падне во нив.

²⁶Упорното срце ќе претрпи зло на крајот.

²⁷Упорното срце ќе биде оптоварено со неволји, а грешникот натрупува гревови врз гревови.

²⁸За болеста на гордиот нема лек; зло билје се вкоренила во него.

²⁹Срцето на разумниот размислува за поука; внимателното уво е желба на мудриот.

³⁰Водата гасне оган што гори, а милостињата чисти од гревови.

³¹Оној што враќа со добро за добрите дела, тој мисли за иднината; во тешко време, ќе најде поткрепа.