Read Свето Писмо (Гаврилова) 1990 Мудрост Сирахова 4 Bible Online

Мудрост Сирахова 4 - Свето Писмо (Гаврилова) 1990 bible

Мудрост Сирахова 4

¹Мудроста воспитува. Синко, не откажувај му ја помошта на сиромавиот; не измачувај ги со долго чекање очите на неволните.

²Не ожалостувај ја душата на гладниот; не огорчувај го оној што е во сиромаштија.

³Не измачувај срце што е веќе огорчено; не ја одлагај милоста спрема оној што нема.

⁴Не одбивај ги молбите на неволниците; лицето твое не свртувај го од сиромавиот;

⁵не свртувај ги твоите очи од оние што просат; никому не давај повод да те колне.

⁶зашто, во жалоста на својата душа те проколнува; Оној Кој го создал — ќе ја послуша неговата молба.

⁷На собранијата настојувај да бидеш пријатен; пред оние што се погоре од тебе — наведнувај ја својата глава:

⁸Доближи го твоето уво кон сиромавиот; одговарај му насмеано и со кротост;

⁹избавувај го навредениот од раката на оној што го навредува; а кога судиш — не биди малодушен.

¹⁰На сираците — биди им како татко, а на нивната мајка — закрилник;

¹¹и ќе Му бидеш како син на Севишниот и Тој ќе те засака повеќе од твојата мајка.

¹²Мудроста ги издигнува своите синови, ги поткрепува оние што ја бараат.

¹³Кој ја сака неа — животот го сака; кој ја бара од рано утро — со радост ќе се исполни.

¹⁴Кој ја има — ќе наследи слава; каде и да појде, Господ ќе го благослови.

¹⁵Кои ѝ служат — на Светиот Му служат; кои неа ја сакаат — Господ нив ги милува.

¹⁶Кој ја слуша — на народи ќе им суди; кој внимава на она што му говори — тој уверено ќе живее;

¹⁷ќе ја наследи оној што ќе ѝ се довери; и потомците негови — ќе владеат со неа.

¹⁸Најнапред таа ќе тргне со него по криви патишта; врз него ќе испрати страв и трепет;

¹⁹ќе го измачува со своето водење сѐ додека не се увери во неговата душа и не го испита во уредбите свои;

²⁰потоа ќе се појави таа кај него на правиот пат, ќе го зарадува,

²¹и ќе му ги открие своите тајни.

²²кога скршне од правиот пат, таа го остава и го предава во рацете на неговата пропаст.

²³Набљудувај го времето и пази се од злото,

²⁴па нема да се посрамиш на твојата душа.

²⁵Има срам што води кон грев, а има и срам што води кон слава и благодат.

²⁶Не биди лицемерен против самиот себе и не срамувај се на своја штета.

²⁷Не задржувај го твојот збор кога тој може да им помогне на другите,

²⁸зашто во зборот се познава мудроста, а во говорот на јазикот — знаењето.

²⁹Не противречи ѝ на вистината, а срамувај се од своето незнаење.

³⁰Не срамувај се да ги исповедаш твоите гревови и не задржувај го текот на реката.

³¹Не потчинувај му се на глупав човек и не биди од страната на силниот.

³²Бори се до смрт за вистината, и Господ Бог ќе се бори за тебе.

³³Не биди брз во говорење, ниту мрзлив и немарен во твоите дела.

³⁴Не биди како лав кога си во својот дом, а претпазлив спрема твоите слуги.

³⁵Да не биде твојата рака пружена за земање, а стегната за давање.